Polonia zotohet të rrisë shpenzimet këtë vit – bëhet me “buxhetin më të madh midis vendeve të NATO-s” për mbrojtjen

Presidenti polak Andrzej Duda njoftoi të mërkurën se vendi i tij planifikon të shpenzojë 4.7% të PBB-së për mbrojtjen këtë vit.

Sipas Duda, buxheti i mbrojtjes kombëtare pritet të arrijë në 30 miliardë euro, gjë që do ta bënte atë buxhetin më të madh të mbrojtjes midis vendeve të NATO-s, shkruan Euronews, përcjell Telegrafi.

Polonia tashmë shpenzon 4.1% të PBB-së së saj për mbrojtjen.

Gjatë një takimi me komandantët e lartë të forcave të armatosura polake, Duda theksoi gjithashtu se Polonia synon të forcojë aleancën e saj të mbrojtjes me SHBA.

“Ne kemi një bazë të përhershme dhe të fortë amerikane kundër raketave në Poloni”, tha Duda, “dhe po vazhdojmë me blerjen e pajisjeve më moderne për ushtrinë polake”.

Varshava, e cila mbështet Ukrainën në luftën e saj kundër pushtimit në shkallë të plotë nga Rusia, po bën blerje të mëdha të pajisjeve ushtarake, duke përfshirë aeroplanë luftarakë, tanke dhe sisteme të mbrojtjes raketore nga SHBA dhe Koreja e Jugut.

Presidenti amerikan Donald Trump është ankuar së fundmi se aleatët e NATO-s të BE-së nuk po shpenzojnë 2% të BPV-së së tyre për mbrojtje.

Pasi tha më parë se do të inkurajonte Rusinë që të “bëjë çfarëdo dreqin duan” aleatëve që nuk paguajnë mjaftueshëm, ai ka kërkuar që pragu i shpenzimeve të rritet në 5%.

Trump ka thënë gjithashtu se nuk do të përjashtonte përdorimin e forcës ushtarake për të marrë kontrollin e Grenlandës, një territor autonom që i përket Danimarkës anëtare të NATO-s.

Kryeministri polak Donald Tusk ka pranuar publikisht se shpenzimet duhet të rriten në të gjithë aleancën dhe u ka bërë thirrje anëtarëve të tij të BE-së që të mbrojnë krahun lindor të Evropës kundër agresionit të Rusisë.

“Nuk ka alternativë, Evropa duhet të financojë projektin e Mburojës Lindore”, tha ai në një samit të mbrojtjes të BE-së në Bruksel këtë javë. /Telegrafi/