Pjesa finale e përfundimtares së Superligës së Kosovës në volejboll për meshkuj po kalon nëpër një udhë, përgjatë së cilës drejtësia po vendoset dhe rivendoset në tavolinë.
Megjithatë, gjithçka mori fundin me vendimin e Bordit të FVK-së, që si organ i shkallës së dytë shfuqizoi vendimit e komisarit, Lulëzim Gërguri, i cili, pas ankesës së Lubotenit për (sipas tyre) parregullsitë në emëroren e lojtarëve të shënuar në protokollin e ndeshjes (9 lojtarë dhe 2 libero), ndeshjen e regjistroi me rezultat zyrtar 3:0 në të mirë të Lubotenit të Ferizajt, shkruan Gazeta Tribuna.
Besa nuk qëndroi duarkryq duke kërkuar rishqyrtimin e këtij vendimi, gjë që megjithatë përfitoi të paktën mundësinë që ndeshja e parë e fituar në fushë nga pejanët 3:1, të rizhvillohet.
Në mbledhjen e Bordit që u mbajt dje, u mor vendimi që të “shfuqizohet vendimi i Komisarit të garave mbi regjistrimin me rezultat zyrtar të ndeshjes Besa-Luboteni, e mbajtur më 7.4.2016.
Inicohet procedura disiplinore ndaj zyrtarëve të kësaj ndeshjeje: procesmbajtësit, gjyqtarit të parë, vëzhguesit, trajnerit të skuadrës mysafire dhe sekretarit të skuadrës mysafire”.
Ndeshja e parë ndërmjet Besës dhe Lubotenit, duhet të riluhet. Bordi I FVK-së ka gjetur shkelje procedural te paraqitja e ankesës së KV Luboteni, ku ka rënë ndesh me nenin 29 të Propozicioneve të Garave. Bordi, gjithashtu, ka gjetur shkelje materiale të skuadrës vendëse, duke rënë ndesh me nenin 3 të Aneks-propozicioneve të Garave”, thuhet në vendimin e Bordit të Federatës së Volejbollit të Kosovës.