Nuk ndalen sulmet e pacientëve ndaj mjekëve – ushtria tani ruan spitalet italiane

Anëtarët e ushtrisë italiane kanë nisur të bëjnë roje në një spital në rajonin jugor të Kalabrisë. Ai erdhi si përgjigje ndaj sulmeve të dhunshme ndaj mjekëve dhe infermierëve nga pacientë të zemëruar dhe të afërmit e tyre.

Sipas theguardian, prefekti kalabrez, Paolo Giovanni Grieco vendosi për sigurinë e spitalit në Vibo Valentina. Anëtarët e ushtrisë italiane kanë mbrojtur personelin mjekësor në një spital në rajonin jugor të Kalabrisë që nga e hëna.

Agjencia ANSA e quajti një pikë kthese sulmin në spitalin Policlinico në Foggia në rajonin jugor të Pulias në fillim të shtatorit. Një grup prej rreth 50 të afërmish dhe miqsh të një 23-vjeçareje që humbi jetën gjatë një operacioni urgjent sulmoi personelin e spitalit. Një sulm i ngjashëm masiv ndodhi mëngjesin e së shtunës së kaluar në Pescara në rajonin e Abruzzo.

Një video e sulmit në poliklinik është bërë virale në rrjetet sociale. Videoja tregon se si mjekët dhe infermierët u barrikaduan në dhomë për t’u shpëtuar sulmuesve. Disa prej tyre u lënduan gjersa ‘fluturuan’ grushtet dhe këpucët.

Dy ditë më vonë, një tjetër valë dhune tronditi të njëjtin spital, me një pacient që goditi me shkelma dhe grushte tre infermiere në urgjencë.

Due ore fa’, il personale sanitario del Policlinico di Foggia è stato aggredito con calci e pugni dai parenti di una ragazza di 23 anni di Cerignola, deceduta durante un intervento chirurgico. pic.twitter.com/8WXOVi3epr

— Luigi Basemi 🏅 (@LBasemi) September 6, 2024

Dy sulme të tjera fizike u raportuan në Napoli, ku mjekët thanë se pacientët dhe familjet e tyre sulmuan një mjek të urgjencës pasi ai u kërkoi atyre të prisnin radhën. Në muajin gusht, në Palermo, një i afërm i një pacienti goditi një vullnetar në spitalin Termini Imerese.

Vitin e kaluar, gjykata dënoi një 62-vjeçar me 16 vjet burg për vrasjen e një mjeku me sëpatë në vitin 2022 përballë spitalit Policlinico San Donato të Milanos, sepse ai besonte se trajtimi që ai kishte përshkruar ishte i panevojshëm.

Arsyet kryesore të pakënaqësisë së pacientëve janë mungesa e stafit dhe pritjet e gjata. Sipas sindikatës më të madhe të mjekëve në Itali, pothuajse gjysma e vendeve të punës në urgjencë mbeten të paplotësuara nga viti 2022.

Për shumë mjekë italianë, pandemia e COVID-19 u bë një pikë kthese që përshpejtoi largimin e tyre jashtë vendit.

Vitin e kaluar sistemit shëndetësor të Italisë i kanë munguar rreth 30 mijë mjekë. Midis 2010 dhe 2020, 111 spitale dhe 113 shërbime të urgjencës u mbyllën në vend. Planet e shpenzimeve të shpallura nga qeveria e Giorgia Melonit parashikojnë shkurtime të mëtejshme në sektorin e shëndetësisë. /Telegrafi/