Nuk është i detyrueshëm vaksinimi i të gjithë futbollistëve për ‘Euro 2020’

Të hënën e ardhshme Komiteti Ekzekutiv i UEFA-s do të ketë një mbledhje shumë të rëndësishme me vendime që pritet të prekin direkt Kampionatin Evropian të Futbollit.

Një prej vendimeve do të jetë zgjerimi i listave të lojtarëve për kombëtaret që do të marrin pjesë dhe numri i tyre do të jetë nga 23 në 25 për çdo skuadër.

Ky vendim merret për një situatë emergjente siç është pandemia dhe për të siguruar çdo ekip që të jetë i kompletuar edhe nëse dalin situata të pakëndshme me dëmtimet apo infektimet nga COVID-19, transmeton KP.

Duke mbetur te pandemia, Komiteti Ekzekutiv i UEFA-s duket se ka përjashtuar çdo mundësi që të gjithë lojtarët pjesëmarrës në Euro 2020 të vaksinohen, kurse një tjetër pike do të jetë emërimi i anëtarit të ri të Komitetit, Javier Tebas për një mandate katërvjeçar.

Në tjetër pike shumë me rëndësi është dhe vendimi për qytetet pritëse të Kampionatit Evropian, ku problem mbeten Dublini, Bilbao dhe Munihu, të cilët kanë bërë rezistencë për të hapur stadiumet gjatë evenimentit për tifozët, teksa Roma vendosi sot (e martë) që të lejojë deri në 25 për qind të tifozëve në Stadio Olimpico, ku do të zhvillohet edhe ndeshja hapëse Itali-Turqi më 11 qershor.