Më shumë se dy javë prej se pësoi goditje në tru, Maria Dolores dos Santos Aveiro është lëshuar nga spitali dhe është kthyer në shtëpi.
Me këtë rast, nëna e Cristiano Ronaldos e ka publikuar një fotografi në rrjetet sociale duke u shprehur e lumtur që është gjallë.
“Jam e lumtur që më është dhënë mundësia të jetoj dhe ta dua familjen time dhe t’i kem ata pranë meje”, ka shkruar 65-vjeçarja në përshkrim.
“Faleminderit të gjithëve për mbështetjen dhe dashurinë. Kanë qenë ditë të vështira, por të luftës dhe fitores. Tash jam në shtëpi, e rrethuar nga dashuria e familjes sime, energjia ime pozitive”, ka shtuar ajo.
Dolores kishte pësuar goditje trunore si pasojë e iskemisë (mosfurnizimit të mjaftueshëm me gjak nga ndonjë arterie trunore), të shkaktuar nga ndonjë tromb (bllokim i qarkullimit të gjakut përmes mpiksjes brenda arteries).
Goditja në tru (insulti cerebral) është një urgjencë mjekësore. Goditja në tru ndodh kur ndalon qarkullimi i gjakut në tru. Brenda pak minutash, qelizat trunore nisin të vdesin. Janë dy lloje goditjesh në tru.
Më e shpeshta quhet iskemia trunore kur ndodh bllokimi i një ene të gjakut për shkak të mbylljes nga ndonjë tromb dhe kështu pamundësohet qarkullimi i gjakut në tru.
Ndërsa lloji tjetër quhet goditja hemorragjike që shkaktohet kur një enë e gjakut dëmtohet dhe gjaku rrjedh brenda trurit.
‘Mini-goditjet në tru’ ose sulmet kalimtare iskemike (TIA) ndodhin kur furnizimi me gjak në tru është i ndërprerë përkohësisht.
Menjëherë pas shtrirjes në spital, nëna e CR7 iu nënshtrua trombektomisë mekanike (heqjes së trombit nga arteria përmes kateterit) dhe qëndroi e hospitalizuar më shumë se dy javë për t’u shëruar. /Telegrafi/