”Ndihmësit” e Katica Janevës dalin para gjykatës

Alsat-M bën të ditur se kryeshefi i njësitit për mbështetje teknike në Drejtorinë për Siguri dhe Kundërzbulim (DSK), Naser Selmanoviq, është i akuzuari i parë për “Ndikim joligjor ndaj dëshmitarëve”, vepër që gjoja e ka kryer në favor të Prokurorisë Speciale Publike (PSP), transmeton Telegrafi Maqedoni.

Gjykimi i 38 vjerçarit Selmanoviq pritej të fillonte sot, por për shkak se pala mbrojtëse nuk i ka parë të gjitha provat e Prokurorisë për ndjekjen e krimit të organizuar, seanca është anuluar. Kryeshefi i drejtorisë për mbështetje teknike në DSK të MPB-së akuzohet se i ka ofruar ryshfet një personi, me qëllim që të paraqitet si dëshmitarë në procedurë para gjykatës dhe të deklarojë në interes të dikujt. Selmanoviq nuk është i vetmi kundër të cilit është ngritur kallëzim penal për presion ndaj dëshmitarëve.

Kur filluan veprimet hetimore të Katica Janevës, në prokurorinë e Marko Zvërlevskit janë ngritur gjithsej 19 kallëzime penale për “Keqtrajtim në kryerjen e detyrës”, si dhe kundër tashmë të akuzuarit Selmanoviq për ofrim të ryshfetit për deklarim të rrejshëm. Një pjesë e kallëzimeve penale janë kundër prokurorëve konkret që punojnë në ekipin e Katica Janevës, ndërsa pjesa tjetër për hetues të cilët funksionojnë në emër të PSP-së. Kallëzimet penale, sipas informatave që i publikuan mediat e afërta me pushtetin, janë ngritur nga qytetarë dhe të punësuar në institucione të ndryshme.

Edhe PSP-ja alarmoi se e dyshuara në lëndën ”Titanik”, Gordana Jankullovska ka ndikuar ndaj të akuzuarve tjerë dhe dëshmitarëve, por për këto pohime nuk ka procedurë penale. Për këto vepra parashihet dënim me burg prej 1 deri 5 vjet./Telegrafi/