Morea Kasapolli shpallet kampione botërore për vallëzim modern

Një yll i ri ka ndriçuar skenën ndërkombëtare të vallëzimit modern. Morea Kasapolli, një 12-vjeçare me origjinë nga Kosova, ka fituar vendin e parë në botë në kategorinë U12 në Kampionatin Botëror të Vallëzimit Modern, i mbajtur në Kielce, Poloni.

Duke përfaqësuar Çekinë si pjesë e ekipit të famshëm “Dance Company MIRAKL”, Morea dhe grupi i saj triumfuan në mesin e mbi 30 shteteve pjesëmarrëse, duke lënë pas Kanada dhe SHBA. Llojet e vallëzimit që e çuan atë drejt fitores ishin modern dhe jazz, ku ajo dhe grupi i saj performuan me mjeshtëri të rrallë dhe energji të jashtëzakonshme.

Në një intervistë për Radio Kosovën, Morea ndau emocionet e saj për këtë arritje të madhe: “Jam ndjerë shumë e lumtur dhe e emocionuar sepse konkurrenca ishte shumë e madhe, ndërsa ne e fituam çmimin e parë në botë”.

Morea shpjegoi se vallëzimi modern dhe jazz kërkojnë bashkëpunim perfekt në grup dhe angazhim maksimal. Në këto kategori, ajo ishte pjesë e një grupi prej 19 vallëtarësh në vallëzimin modern dhe 22 vallëtarësh në vallëzimin jazz. Ajo theksoi sfidat që ka hasur në këtë rrugëtim, duke përfshirë konkurrencën e fortë dhe përpjekjet për t’u bërë pjesë e grupit elitar të “Dance Company MIRAKL”.

“Vështirësitë janë të mëdha, sepse konkurrenca ka qenë e madhe, pasi kanë marrë pjesë mbi 30 shtete të botës”, u shpreh ajo.

Morea, e cila ka lindur dhe jeton në Çeki, është mbesa e komentatorit të njohur kosovar të sportit, Agim Kasapolli. Vallëzimi ka qenë pasioni i saj për tri vite, por vitin e fundit ajo i është përkushtuar më shumë se kurrë, duke fituar një vend në studion më të mirë të vallëzimit në Çeki.

“Vallëzimi më pëlqen shumë dhe me të merrem që tre vite. Vitin e fundit, kam pasë fatin të pranohem në studion më të mirë të vallëzimit në Çeki, ‘Dance Company MIRAKL’”, tha ajo.

Me këtë sukses të madh, Morea është e vendosur të vazhdojë përkushtimin ndaj pasionit të saj dhe synon të marrë pjesë në gara edhe më të mëdha ndërkombëtare. Përkushtimi, talenti dhe vendosmëria e saj janë një shembull frymëzimi jo vetëm për vallëtarët e rinj, por për të gjithë të rinjtë që ndjekin ëndrrat e tyre. /Telegrafi/