Mish i rrahur i çastit (eskallop)

Përbërësit:
* 500 g mish viçi
* 4 lugë gjelle margarinë ose gjalpë
* 1 filxhan kafeje miell
* gjysmë gote verë
* 5 thelpinj hudhra
* pak majdanoz
* kripë e piper
* 200 g kërpudha
* 200 g patëllxhanë
* vaj për skuqjen e tyre

Gatimi
Mishi i rrahur i çastit që në gjuhën e kuzhinës quhet eskallop, është fetë
shumë e hollë që merret nga shtylla kurrizore, pjesa e brendshme ose e sipërme e viçit si dhe nga pjesët e tjera të kofshës.

Fetat e mishit duhet të priten në drejtim të kundërt të fijeve. Pasi pastrohet nga fijet e dejet e tepërta, mishi pritet në dy copa për racion dhe rrihet që të hollohet pak (trashësi ½ cm).

Kthehen anët me thikë dhe i jepet mishit një formë e rregullt rrethi, hidhet kripë e piper nga të dyja anët, vihet në tigan ku është hedhur yndyra dhe skuqet (pasi kalohet më parë në pak miell).

Kullohen mirë nga yndyra, vihen në pjatë dhe ruhen në vend të nxehtë.

Lahet mirë patëllxhani, priten në formë rrethi, u hidhet kripë, kalohen në miell dhe skuqen në tigan.

Në yndyrën ku u skuqën eskallopët hidhen kërpudhat, hudhrat e prera hollë, hidhet vera dhe lihen që të marrin valë. Në fund shtohet majdanozi.

Vihen copat e mishit në pjatë, patëllxhanët të fërguara dhe sipër mishit hidhet salca e përgatitur.

Shënim: Mishi i rrahur i çastit (eskallopët) mund të vihet për 5-10 minuta në furrë, pasi shtrohet në tavë dhe hidhet përsipër salca. Në këtë mënyrë veprohet kur mishi është pak i fortë. /Telegrafi/