Masat anti-COVID, kthehen automjetet që nuk kanë autorizim të hyjnë në Prishtinë

Rritja drastike e numrit të infektuarve me virusin COVID-19 ka shtyrë Ministrinë e Shëndetësisë që gjatë fundjavës të ndalojë hyrje-daljet në kryeqytet dhe në gjashtë komuna të tjera ku gjendja është më e rëndë.

Në hyrje daljet e Prishtinës,kanë filluar kontrollet nga Policia e Kosovës, duke kthyer kështu automjetet të cilët nuk lejohen të hyjnë në kryeqytet, duke u bazuar në vendimin e Qeverisë së Kosovës.

Por, janë qytetarë të cilët ndajnë mendime të ndryshme për rikthimin e karantinës.

Qytetari Pjero Aziri, përveç që shpreh dyshime rreth prezencës së virusit korona, ai vendimet e fundit të qeverisë i konsideron të panevojshme.

“Katastrofë për Zotin katastrofë, nuk e di çka me të thanë. A pas orës 6 sot vjen e të hënën ik virusi a çka është problemi nuk jam t’u e kuptu. Pse diku tjetër nuk i kanë mbyll nuk e di në Kosovë çka është tu u bë.. Jo more çfarë nuk ka më virus sa e di unë, nuk ka virus”, ka deklaruar ai.

Derisa Visar Baxhuku, thotë se është akoma herët për t’i vlerësuar masat e reja të cilat filluan të implementohen mbrëmë, por që sipas tij, me rritjen e numrit të rasteve ka qenë i nevojshëm shtrëngimi i masave.

“Është herët me i vlerësu në bazë të rezultatit shihen se a kanë qenë të arsyeshme, herët por situata nuk është e mirë me infeksionet që po rritën. Nuk e dimë a janë të qëlluara por prapë se prapë duhet të ndërmerret diçka”, ka deklaruar ai.

Ndërkaq, qytetari Agim Mirena, i mirëpret masat e reja, për çka thekson se situata me pandeminë është rënduar.

“Paj pasha Zotin nuk e di, po kanë me pas ka me u bë mirë…Jo jo nuk po na pengojnë nuk kemi çka bëjmë virus i madh”, ka thënë Mirena për KosovaPress.

Kurse, zyrtari për medie në Policinë e Kosovës, Bajram Krasniqi, ka bërë të ditur për KosovaPress, se Policia ka dalë në teren dhe se është duke zbatuar vendimin e qeverisë. Derisa ka theksuar se në 24 orët e kaluara janë shqiptuar 1 mijë e 37 gjoba për ata që nuk e kanë respektuar ligjin anticovid.

“Policia e Kosovës prej fillimit të pandemisë në mars është duke e zbatuar një plan operativ dhe aktivitetet e Policisë në teren janë në përputhje me vendimet e institucioneve të Republikës së Kosovës. Edhe me vendimet e fundit Policia e Kosovës është duke zbatuar vendimet e institucioneve, kurse sa i përket gjobave të shqiptuara bazuar në ligjin atnicovid në 24 orët e kaluara Policia ka shqiptuar 1 mijë e 37 gjoba të ndryshme për individ dhe institucione të cilat kanë ra ndesh me ligjin anticovid”, ka thënë Krasniqi për KosovaPress.

Kujtojmë se vendimi i vendimi i fundit i qeveris ndalon hyrje/daljet e qytetarëve dhe automjeteve private prej orës 20:00 nga dje deri të hënën në Komunën e Prishtinës, Fushë Kosovës, Gjilanit, Obliqit, Gjakovës, Podujevës dhe Shtimes./Telegrafi/