Maloku për Thaçin: U emërua drejtor i Drejtorisë Politike në dhjetor të 1998-ës

Dëshmitari Naim Maloku tha se Hashim Thaçi në dhjetor të 1998-ës është emëruar drejtor i Drejtorisë Politike në Shtabin e Përgjithshëm të UÇK-së.

Dëshmitari tha se ka pasur diskutime në gusht të 1998-ës lidhur me personin që do të përfaqësonte shqiptarët e Kosovës në marrëveshjen me Sllobodan Millosheviqin.

Ai tha se Hashim Thaçi gjithmonë ka pasur mirësjellje ndaj Malokut gjatë takimeve.

“Nuk kam vërejtur që ka ndonjë mendim jorespektues ndaj meje apo ndonjë qëndrim”, tha Maloku.

Ai u përgjigj me ‘e saktë” kur u pyet se a është e vërtetë që pas mbarimit të luftës (Maloku) u emërua këshilltar i Hashim Thaçit, raporton “Betimi për Drejtësi“.

“Këshilltar për siguri nga shtatori. Nuk e di datën sa, por në shtator. Kam qenë deri në nënshkrimin e marrëveshjes për demobilizimin e UÇK-së”, tha dëshmitari.

Maloku shtoi se deri me nënshkrimin e marrëveshjes për kalimin e UÇK-së në TMK, deri në atë ditë ka qenë këshilltar i Thaçit.

Dëshmitari tha se gjatë konfliktit ishte hera e fundit që e kishte parë Thaçin në tetor të vitit 1998. Tha se vetëm në dhjetor të 1998-ës ka folur në telefon.

“Nuk më kujtohet që e kam pa më fizikisht zotin Thaçi gjatë asaj kohe”, tha Maloku.

Maloku theksoi se nuk ka dijeni nëse Zona Operative e Dukagjinit raportonte në Shtabin e Përgjithshëm përpara dhjetorit të 1998-ës.

“Shtabi i Përgjithshëm nuk ka rol komandues në asnjë ushtri por ka rol drejtues. Komunikimin me zona operative e ka bërë Drejtoria Pperative e Shtabit të Përgjithshëm dhe jo Shtabi i Përgjithshëm”, ta ndër tjerash Maloku.