Ligji i ri, në Shqipëri të gjithë janë nën përgjim – hetime dhe kontrolle pa mandat

Projekt ligji për parandalimin ndjekjen dhe marrjen e masave ndaj krimit të organizuar, terrorizmit dhe krimeve të renda, i propozuar nga Qeveria e Shqipërisë, parashikon ngritjen e një strukture të posaçme me emrin drejtoria kundër krimit të organizuar e cila se bashku me drejtorinë e anti terrorit do të jene përgjegjëse për zbatimin e këtij ligji.

Fokusi i ligjit do të jenë të gjithë ata persona që janë dënuar me vendim te formës së prerë për krim të organizuar por edhe ata për të cilët ka dyshime apo kanë rekorde të mëparshme kriminale.

Masat ndaj tyre nisin që në momentin që kërkojnë të vijnë ne Shqipëri, dhe drafti parashikon se atyre nuk mund tu lejohet hyrja dhe kthimi në shtëpi pa iu nënshtruar një verifikimi nga policia në piken e kalimit kufitar. Për të gjithë këta, policia e shtetit mund të urdhërojë kufizimin e perimetrit të lëvizjes brenda një zone administrimi apo qyteti, si dhe mund tu merret përkohësisht pasaporta.

Ligji parashikon masa specifike për pasurinë e të gjithë eksponentëve te krimit të organizuar.

Policia e shtetit mund të urdhërojë masën e sekuestros për çdo aset ose çdo pasuri që disponohet, administrohet apo është në pronësi të subjekteve nën hetim, masë e cila duhet të vleftësohet nga Prokuroria brenda 48 orëve.

Por pikat më të debatuara të këtij ligji janë parashikimet për përgjimet të cilat realizohen pa vendim gjykate.

Strukturat e Policisë së Shtetit do të kryejnë përgjime ambientale në ambiente private me autorizim të drejtuesit të Prokurorisë përkatëse.

Strukturat e Policisë së Shtetit do të kryejnë përgjime ambientale në vende publike me miratim të drejtuesit të strukturës vendore të policisë dhe kur çështja ndiqet nga strukturat qendrore miratimi jepet nga drejtuesi i strukturës përkatëse qendrore të policisë.

Ky ligj i jep të drejtën policisë të bëjë kontroll pa vendim gjykate.

Strukturat e Policisë së Shtetit kryejnë me iniciativë kontrolle për parandalimin e akteve terroriste, parandalimin e kryerjes së krimit të organizuar apo të një krimi të rëndë në mjedise publike të hapura, me iniciativë nga një punonjës policie me gradën nënkomisar i lartë.Në ndërtesa apo objekte të tjera shtetërore e private, me iniciativë nga një punonjës policie me gradën nënkomisar i lartë.

Ndërsa kontrolli ne banesa private mund të realizohet me autorizimin e prokurorit. Këto kompetenca që ligji special i jep policisë pritet te jene ne qendër të debatit pasi tashme opozita është pozicionuar kundër./Vizion Plus/