Kronisti i Luftës së Ftohtë

Fotoreporteri Thomas Billhardt (1937- 2025), i cili ndërroi jetë në janar, dokumentoi jetën e përditshme në Gjermaninë Lindore, si edhe vizitat e Castros dhe Gorbachevit, rënien e Murit të Berlinit dhe jetën në Vietnam gjatë luftës.

Përgatiti: The Guardian
Përktheu: Telegrafi.com

Doan Trang, Hanoi, Vietnam, 1975
Si fotograf i reportazheve, Thomas Billhardt udhëtoi në 50 vende dhe imazhet e tij janë publikuar në mbarë botën. Ai ndërroi jetë më 23 janar. Në kujtim të tij, galeria “Camera Work” në Berlin hapi një ekspozitë me 30 vepra të tij.

Pika e kalimit kufitar [Checkpoint Charlie] në Berlin, 1963
Fotografitë e Billhardtit janë dëshmi e një pjese të rëndësishme të historisë gjermane.

Mikhail Gorbachev dhe Erich Honeker, aeroporti Berlin-Shënefeld, 1989
Billhardti kishte aftësinë të ishte një vëzhgues i padukshëm i ngjarjeve – një mënyrë pune që i dha një perspektivë unike mbi shumë rajone të prekura nga lufta në mbarë botën. Kjo foto tregon mysafirin e fundit shtetëror të RDGj-së.

Strehë kundërajrore, Hanoi, Vietnam, 1968
“Për herë të parë përjetova luftën si i rritur në vitin 1967, në Hanoi”, ka thënë Billhardt. “Pashë njerëz që futeshin në tuba betoni, në trotuaret e qytetit, ku njerëzit qëndronin për t’u mbrojtur. Kushdo që gjente një vend aty gjatë një bombardimi dhe e mbyllte me kapakun e betonit, ishte goxha i mbrojtur. Njëri nga tubat nuk kishte kapak dhe, kur pashë brenda, pashë sytë e frikësuar të fëmijëve. Katër fëmijë ishin ngujuar në atë tub. Nuk kishin forcë të mbyllnin kapakun e rëndë. Aty e bëra fotografinë time të parë nga lufta”.

Nata e Vitit të Ri te Porta e Brandenburgut, hapja e Murit të Berlinit, 1989
Veprat e Billhardtit nuk janë vetëm dëshmi vizuale të kohës, por flasin edhe për ndryshimet shoqërore, emocionet dhe ngjarje formuese të shekullit XX.

Sheshi Aleksandër, Berlin, 1963
Gjatë viteve, Billhardti krijoi një kronikë të zhvillimit të Sheshit Aleksandër dhe personazheve të tij. Ky u bë gjithashtu një studim mbi modën dhe stilin e jetesës së njerëzve.

Vizita e Leonid Brezhnevit, Berlin, 1974
Kjo fotografi u realizua në 25-vjetorin e RDGj-së, në aeroportin Berlin-Shënefeld. Gjatë studimeve në Lajpcig, Billhardti u bë anëtar i Shoqatës së Gazetarëve Gjermanë. Vitet në vijim i kaloi duke punuar si fotograf i pavarur – një privilegj që ai çmonte, sepse i jepte lirinë për të lëvizur lirshëm.

Një autobus si depo ushqimore në Altenburg, 1964
Billhardti filloi të trajnohej si fotograf në moshën 14-vjeçare, nën udhëheqjen e nënës së tij, dhe që prej asaj kohe iu përkushtua artit të fotografisë.

Berlin, 1963
Përkushtimi i thellë ndaj zanatit, i kombinuar me një kureshtje të pashtershme, e shtyu Billhardtin përpara – gjatë gjithë jetës së tij. Ai kërkonte gjithmonë momentin, të vërtetën dhe historinë prapa fotografive.

Fidel Castro dhe Erich Honecker, Lojna, Gjermani, 1972
Përmes fotografive, Billhardti edukoi publikun mbi luftën dhe vuajtjet që ajo sjell.

Fëmijë me buall, Pak Bo, Vietnam, 1975
“Vietnami kishte të bënte gjithashtu shumë fëmijë në fshat që ruanin buaj të mëdhenj, që peshonin shumë dhe kishin brirë të mëdhenj”, ka thënë Billhardt. “Këta kolosë janë mishërimi i butësisë. Fëmijët ngjiteshin mbi kokat dhe brirët e tyre, hipnin në shpinën e tyre, bënin çapkënllëqe apo flinin aty. Disa bënin detyrat e shkollës mbi buaj ose përdornin barkun e tyre si tabelë shkolle”.

Sheshi Aleksandër, Berlin, 1959
Në reportazhet dhe portretet e tij, Billhardti jo vetëm që përshkroi botën, por e bënte atë të prekshme dhe u jepte zë njerëzve – veçanërisht më të pambrojturve. /Telegrafi/