Kosova dëshiron të na bëjë krenar, kërkon mbështetje të madhe kundër Maqedonisë më 2 gusht

Në kuadër të përgatitjeve për parakualifikimet evropiane për Kampionatin Botëror “Kina 2019”, Përfaqësuesja e Kosovës nuk ka të ndalur me fitore.

Pas fitores ndaj Sllovakisë me rezultat 69 – 61, Kosova mposhti edhe Shqipërinë me rezultat 90 – 72, duke dëshmuar edhe njëherë pasionin e këtij ekipi për fitore, por mbi të gjitha për përpjekjet e tyre për të na bërë krenar.

Kosova bën gara në Grupin C të parakualifikimeve evropiane për Kupën e Botës “Kina 2019” së bashku me Maqedoninë dhe Estoninë, ndeshje këto që do të fillojnë më 2 dhe do të përfundojnë më 19 gusht 2017.

Ndeshjen e parë Përfaqësuesja jonë do ta luaj si nikoqire me 2 gusht kundër Maqedonisë në Pallatin e Rinisë dhe Sporteve në Prishtinë.

Që tifozët t’i shijojnë fitoret, edhe duhet dhënë vullnet ekipit. Andaj sot më shumë se kurrë Përfaqësuesja e Kosovës ka nevojë për përkrahjen që pasionin e tyre për basketbollin, fitoren t’i përçojmë deri në Kinë.

Vetëm paramendoni flamurin e Kosovës që valëvitet në mes të Kinës, dhe paraqitjen e ekipit kosovar. Ndjenjat dhe emocionet do të ishin të papërshkrueshme.

Andaj, sot më shumë se kurrë ekipi ka nevojë për përkrahjen tonë.

Me 2 Gusht, duke filluar nga ora 20:15, të mblidhemi të gjithë në Pallatin e Rinisë dhe Sporteve dhe të tregojmë së pari dashurinë për basketbollin, pastaj përkrahjen, e mbi të gjitha kulturën e tifozerisë më të flaktë.