Konjufca kërkon që të shtyhet aplikimi i Kosovës për anëtarësim në Interpol

Ministri i Punëve të Jashtme, Glauk Konjufca ka kërkuar që të shtyhet aplikimi i Kosovës për anëtarësim në Interpol.

Konjufca këtë e kërkoi në mbledhjen e Qeverisë së Kosovës.

“Sipas analizave të brendshme të ministrisë që unë e përfaqësoj, gjendja nuk duket shumë optimiste krahasuar me dy vitet e kaluara, Kosova nuk ka ndryshuar shumë pozicion sa i përket mbështetjes prej shteteve që kërkojnë Kosovën me u anëtarësua në Interpol.

Ne do ta marrim një vendim, vendimi sipas analizave thotë se sipas të gjitha parametrave Kosova do ta kishte të njëjtin rezultat po të aplikonte edhe këtë vit. Nëse duam të evitojmë këtë situatë, atëherë propozohet që të jetë në një takim të vitit të ardhshëm që do të jetë më i përshtatshëm për ne edhe në kuptimin e vendit ku mbahet që është në Turqi ku do të mund të ndodhte një punë më e madhe dhe një angazhim më i madh”, ka thënë Konjufca.

Ai ka shtuar se dështimet e njëpasnjëshme të Kosovës nuk janë të mira për Republikën tonë.

Kryeministri Kurti tha se do ta trajtojë këtë çështje si urgjente dhe se do të marrin shumë shpejt një vendim meritor. /Telegrafi/