As këtë vit nuk do të ketë miratim për teknologjinë e drejtimit pa shofer të makinave Tesla, thotë Elon Musk

Softueri i avancuar i asistentit të shoferit të Tesla Inc nuk do të marrë miratimin rregullator në vitin 2022, tha CEO i kompanisë, Elon Musk në komentet që tregojnë se kompania nuk është ende në gjendje të kënaqë autoritetet që makinat e saj mund të drejtohen pa shofer pas timonit.

Prodhuesi i automjeteve të Silicon Valley shet një shtesë softuerike prej 15 mijë dollarësh të quajtur “Full Self-Driving” (FSD) që iu mundëson automjeteve të saj të ndryshojnë korsinë dhe të parkojnë në mënyrë autonome. Kjo plotëson tiparin e tij standard “Autopilot” që iu mundëson makinave të drejtojnë, të përshpejtojnë dhe të frenojnë brenda korsive të tyre pa ndërhyrjen e shoferit.

Megjithatë, makinat ende duhet të drejtohen me mbikëqyrjen njerëzore. Një automjet plotësisht autonom do të kërkonte miratimin rregullator, transmeton Telegrafi.

Musk tha në një telefonatë pas fitimeve të mërkurën se të gjithë përdoruesit e FSD-s në Amerikën e Veriut do të marrin një version të përmirësuar në fund të vitit, duke shtuar se ndonëse makinat e tij nuk janë gati të voziten pa shofer në timon, shoferëve rrallë do t’u duhej të preknin kontrollet.

“Makina do të jetë në gjendje t’ju dërgojë nga shtëpia në punë, në shtëpinë e mikut tuaj, në dyqan ushqimor pa prekur timonin”, tha ai.

“Është një çështje më vete nëse do të ketë miratim rregullator. Nuk do të ketë miratim rregullator në atë kohë”, shtoi ai.

Musk tha gjithashtu se Tesla shpreson të sigurojë një përditësim të FSD-s në vitin 2023, për t’ju treguar rregullatorëve se makina është shumë më e sigurt se shoferi mesatar.

“Musk po hap mundësinë që Tesla të ketë një rrugë më të vështirë për miratimin për FSD duke pasur parasysh NHTSA-në e shtuar dhe shqyrtime të tjera”, tha Craig Irwin, një analist në Roth Capital. /Telegrafi/