Kanotieret dhe bluzat

Është sezoni për të veshur bluza pa mëngë, kanotiere (sidomos bust, apo me rripa të hollë).

Kanotierat janë shumë në modë, shumë prej të cilave vishen 2 njëra mbi tjetrën. Stili "layering" ku vishet kanotiera mbi tjetrën është shumë cool, por tani dhe praktikohet si me kanotiere të të njëjtit model. Ky lloj "layering" funksionon edhe për bluzat T-shirt. Vazhdojnë të jenë në modë kanotierat tub apo bust edhe ato me rrip prapa qafës. Bluzat me kopsa të stilit të këmishës preferohen më shumë për në mbrëmje dhe dominante për këtë është atllasi apo copat e mëndafshta, kryesisht në ngjyra të ndezura dhe tone të errëta, pra si ngjyra smerald, blu e errët, vishnje si rubi, jeshile si bari, ngjyra floriri dhe bronzi, etj.

Këtë verë janë në modë edhe bluzat që janë të hapura nga prapa, sidomos me një "V" të madhe që arrin deri tek beli. Bluza te tilla kane një dekolte shumë modeste përpara, zakonisht me jaka të derdhura si "cowl neck" apo jaka në formë varke "boat neck". Gjithashtu ka edhe bluza që lidhen nga prapa, qoftë vetëm njëherë në mes, prapa gjoksit, apo 2-3 herë: njëherë lidhen prapa qafës, njëherë në mes të kurrizit, dhe njëherë në fund të bluzës, tek beli. Bluza të tilla janë shumë elegante dhe seksi duke ekspozuar një pjesë shumë delikate, por edhe sensuale të femrës – kurrizin e saj. /Telegrafi/