Haradinaj: Kosova në duar të mafias energjetike, retorika boshe e Qeverisë Kurti i ka filluar goditjet e para për popullin

Kryetari i Aleancës për Ardhmërinë e Kosovës, Ramush Haradinaj ka thënë se Kosova është në duar të mafias energjetike dhe sipas tij po i vihet në pah gabimi strategjik i Qeverisë Kurti për anulimin e projektit Kosova e Re.

Haradinaj përmes një postimi në Facebook, ka thënë se nuk ka besuar se për një kohë të shkurtër ky gabim do të dilte në pah.

“As unë nuk e kam besuar që për një kohë aq të shkurtër të vinte në pah gabimi strategjik i Qeverisë Kurti për anulimin e projektit Kosova e Re në Maj të 2020 i nënshkruar me kompaninë Amerikane Contour Global. Kur ne kemi nënshkruar marrëveshjen në vitin 2017 për investim prej 1.3 miliardë euro, ne kemi qenë të vetëdijshëm se thëngjilli nuk është e ardhmja e energjisë por, Kosova nuk ka pas alternativë të shpejtë që ruan qytetarin, garanton zhvillim ekonomik dhe ruan pavarësinë energjetike të Kosovës. Ne nuk ishim vend aq i zhvilluar që me lehtësi dhe pavarësisht kostos së lartë, kalon në energji alternative”, shkruan Haradinaj.

Sipas tij, me 500MË që do të prodhoheshin dhe me 10.000 vende të reja të punës që do të krijoheshin, dhe kanë besuar se dëmet në ambient do të ishin të pranueshme, në raport me përfitimet që do të kishte Kosova.

“Jam fyer dhe jam linquar për atë se çmimi i energjisë i garantuar prej 80€ MË është tejet i lartë dhe se ky çmim do të shkatërrojë ekonominë e Kosovës e lloj lloj sharjesh tjera. Të kota ishin sqarimet tona se të gjitha parashikimet ishin se çmimet e energjisë së vitit 2017 ishin të paqëndrueshme”, thotë Haradinaj.

Tutje ai shkruan se ka qenë i bindur që këto fushata kanë qenë të orkestruara dhe financuara nga mafia energjetike.

“Mafia energjetike e cila meqenëse veq kishte gjetur strehë tek lëvizja Vetëvendosje me ndërtimin e kapaciteteve të reja do të humbiste një treg të madh siç është tregu i Kosovës”, shkruan Haradinaj.

“Sot zyrtarët e KEDS dhe KOST në raportet e tyre thonë se: KEDS dhe KESCO gjatë tetorit të këtij viti, pra, për një muaj, përkundër motit të mirë, ka importuar 9,15 milionë euro energji elektrike me çmim mesatar prej €242 megavat/orë kurse gati dyfishi i vlerës së tetorit është importuar me çmim prej €340 me 24 Nëntor. Kërkesa është rritë me 200MË në krahasim me vitin e kaluar”.

Ndërkaq tutje, Haradinaj thotë se nuk ka informacione si është situata në dhjetor, por e qartë që në momentin e parë që ashpërsohet moti, një Zot e di sa do të jetë çmimi.

“Dhe është pikëpyetje e madhe se a do të ketë Kosova mjete që të blejë energji me çmime astronomike. KEDS dhe KESCO nuk kanë se si të i shpëtojnë kolapsit nëse trendet aktuale vazhdojnë. Popullizmi dhe retorika boshe e Qeverisë Kurti po shihet se i ka filluar goditjet e para për popullin e Kosovës dhe dëmet e vendimeve të gabuara strategjike  për kohë të gjatë do të i paguajë qytetari i Kosovës”, shkruan tutje ai.

Sipas tij, refuzimi i projektit të gazsjellësit, ka pasoja edhe në pozitën energjetike të Kosovës.

“Fatkeqësisht edhe refuzimi i gazsjellësit amerikan, së fundmi, do të sjellë pasoja të paparashikueshme për pozitën energjetike të Kosovës dhe jo vetëm. Me të drejtë shtrohet pyetja: Kush janë këta njerëz që rrezikojnë stabilitetin e çmimeve dhe pavarësinë energjetike të Kosovës?!”, përfundon Haradinaj. /Telegrafi/