Gruaja ngjitet pasi ishte futur deri në fund të pusit – një nga rastet që nxjerrë në pah mungesën akute të ujit në disa zona të Indisë

Një video virale që tregon një grua që ngjitet në murin e një pusi për të hyrë aty ku ka ujë, ka nxjerrë në pah mungesën akute të ujit në disa zona të shtetit qendror indian të Madhya Pradesh.

Sipas mediave të huaja, përcjell Telegrafi, videoja tregon gruan duke zbritur në pus pa litar apo ndonjë pajisje tjetër për të hyrë deri aty ku ka ujë.

Siç thuhet më tej, njerëzit në fshatin Ghusiya janë detyruar të marrin masa të tilla ekstreme pasi puset dhe pellgjet janë tharë.

Disa zona të tjera në të gjithë Indinë po përballen me krizë të ngjashme të ujit.

Një raport global i vitit 2019 e kishte emëruar Indinë në mesin e 17 vendeve ku “stresi i ujit” ishte “jashtëzakonisht i lartë”.

#WATCH | Madhya Pradesh: People in Dindori's Ghusiya village risk their lives to fetch water from an almost dry well pic.twitter.com/jcuyLmE5xL

— ANI MP/CG/Rajasthan (@ANI_MP_CG_RJ) June 2, 2022

Raporti tha se shtetet e Madhya Pradesh, Punjab, Rajasthan, Uttar Pradesh, Gujarat, Uttarakhand dhe Haryana ishin ndër ato më të goditura nga kriza.

Në Madhya Pradesh, mungesa e ujit është një çështje që përsëritet çdo verë. Qeveria e shtetit ka premtuar furnizim me ujë nga rubineti për çdo fshat deri në vitin 2024. Por uji i pijshëm është ende i paarritshëm për miliona njerëz.

Ndërkohë në Ghusiya, fshatarët e zemëruar kanë thënë se do të bojkotojnë zgjedhjet lokale këtë vit për të protestuar kundër qeverisë.

Shumë indianë në mediat sociale reaguan ndaj asaj që ata e quajtën një video “zemërthyese” dhe u kërkuan zyrtarëve që të ndihmojnë urgjentisht fshatin.

India parashikohet të përballet me “stres të rëndë” uji deri në vitin 2050, me 30 qytete që thuhet se do të bien në rajone me rrezik të lartë. /Telegrafi/