Estonia i shkakton humbje të thellë Kosovës

Kosova ka pësuar humbjen e parë në para-kualifikueset e botërorit Kina 2019.

Basketbollistët tanë humbën kundër estonezëve me rezultat 76:50 në kuadër të Grupit C.

Fillim i ndeshjes i takoi kosovarëve dhe u duk se vendasit nuk do ta kenë të lehtë, por në fund të pjesës së parë epërsia e estonezëve ishte dyshifrore.

Çereku i parë i takoi vendasve me dy pikë epërsi 17:15, megjithëse kosovarët kishin avantazh prej tetë pikëve (10:2).

Por, dhjetë minutshi i dytë i takoi plotësisht estonezëve, të cilët ngritën epërsinë në shifrat dyshifrore, 40:29.

Pjesa e dytë ishte pothuajse sa për statistika pasi që estonezët, në saje të një loje të bukur dhe pakujdesisë sonë, treguan se do të fitonin edhe takimin e dytë.

Estonia në dhjetë minutshin e tretë dëshmuan vlerat dhe arsyen pse janë favoritë të grupit, duke përmbyllur këtë periudhë me rezultat 60:41.

Në çerekun e katërt, te dyja skuadrat nuk shënuan shumë pikë, por Estonia shënoi fitoren e dytë në grup në saje të rezultatit 76:50.

Më të dalluarit te Estonia ishin Hallik me 15 pikë dhe Sokk me 14 pikë. Te Kosova u veçuan Erjon Kastrati me 11 pikë (asnjë në pjesën e dytë), derisa 9 pikë shtoi edhe Drilon Hajrizi.

Duhet përmendur që faktor kryesor në humbjen e Kosovës ishin gjuajtjet e dobët nga loja. Përfaqësuesja e Kosovës gjuajti nën 32% si nga gjuajtjet për 2 pikë, ashtu edhe ato për 3 pikë.

Theksojmë se pas kësaj humbje, Estonia ka dy fitore, Kosova një fitore dhe po aq humbje ndërsa Maqedonia ka pësuar dy herë.

Kujtojmë se takimin e radhës, Kosova do ta zhvillojë të shtunën (12 gusht) në Shkup kundër Maqedonisë. /Telegrafi/