Dy rastet e reja me coronavirus janë nga Gjilani – një 20 vjeçar dhe një 36 vjeçare

 Instituti Kombëtar i Shëndetësisë Publike të Kosovës (IKSHPK), ka bërë të ditur se janë konfirmuar edhe dy raste të reja me COVID19, në vendin tonë.

Duke shkuar kështu në 30 numri i të infektuarve me coronavirus në Kosovë.

Siç njoftohet, dy rastet pozitive janë raste me vendbanim nga Gjilani, njeri i gjinisë mashkullore me moshë 20 vjeç dhe tjetra e gjinisë femërore e moshës 36 vjeç.

Po ashtu këtë të shtunë, më herët u konfirmuan katër raste.

Njëri është rast i importuar nga Gjermania, i gjinisë mashkull, 32 vjeç me vendbanim në Bibaj-Ferizaj.

Tre rastet tjera pozitive janë raste kontakti, dy prej tyre janë me vendbanim në Prishtinë femra të moshës 50 dhe 29 vjeçare dhe e treta me vendbanim në Gjakovë e gjinisë femër, 40 vjeçare.

Instituti u ka bërë thirrje edhe njëherë qytetarëve që të respektojnë masat e rekomanduara nga ta dhe Ministria e Shëndetësisë, në të kundërtën kanë deklaruar se rrezikohet përhapje komunitare.

Instituti ka shkruar se me dalje të tilla në hapësirat publike rekreative rrezikohet shëndeti me përhapjen e Covid19.

“IKShPK shpreh shqetësimin për lëvizjet e shumta dhe grumbullime të qytetarëve në qytet, parqe dhe vende rekreative të hapura, të cilat mund të rrezikojnë shëndetin e popullatës dhe përhapjen e COVID-19, e cila aktualisht është e lokalizuar. Por, nëse nuk u përmbahemi masave të rekomanduara më herët nga MSh dhe IKSHPK për qëndrim në shtëpi, respektim të masave higjienike dhe të distancimit s ocial, atëherë rrezikojmë të kemi përhapje komunitare”.

“TA PARANDALOJMË KËTË! QËNDRONI NË SHTËPI, KJO UA SHPËTON JETËN!”, ka shkruar Instituti. /Telegrafi/