Breshëri ‘godet’ fermerët, 80 për qind e prodhimit në Devoll i dëmtuar

Mollët në Devoll nuk do të hyjnë në treg sepse breshëri i rënë së fundmi i ka nxjerrë jashtë cilësie.

Është një situatë e përsëritur sepse për të pestin vit radhazi fermerët e Devollit preken nga breshëri ndërkohë që qeveria shqiptare ende nuk ka dhënë asnjë dëmshpërblim për ta.

Për të disatin vit radhazi fermeri Medat Rusi ndodhet në vështirësi, pasi sipërfaqet e mbjella me mollë i dëmtohen nga reshjet e breshërit. Ai tregon se në kushte të tilla humbja është shumë e madhe.

“Këto 4 vite ka bërë dëme të mëdha breshëri e kemi dalë gjithmonë me humbje. Në kushte të tilla po i presim mollët dhe mbjellim ndonjë dylym qepë e patate sa te hamë bukë. Kostoja në baçe me shkon çdo vit 6-7 milion lek, me plehra me spërkatje për 20 dylym mollë. Këto para i kemi nxjerre nga xhepi nga ato që kishim mbledhur. Rrjeta nuk i bëjmë dot, i bëjne ata që punojnë nëpër bashki etj. Dëmshpërblime asnjëherë, dalin verifikojnë po u them kot shikoni se asnjëherë nuk do na jepni” – tregoi ai.

Edhe fermerët e tjerë tregojnë se dëmet janë të konsiderueshme.

“Dëmi sipas përllogaritjes që bëjmë është rreth 40-50% e prodhimit pavarësisht se nuk është bërë ende verifikimi. Kjo po bën 4 vite kështu, po na dëmton, pavarësisht se një pjesë ka hequr dorë se s’ka më leverdi, ka kosto të lartë, sidomos këtë vit ka shumë sipërfaqe të mëdha që është prerë, po heqin dorë nga pemëtaria, për shkak të breshërit,” – tha fermeri Sulejman Meço.

“Bresheri 8 dylym i ka dëmtuar rreth 35-40% ndërsa 8 dylym të tjera mbi 80%. Unë për vete time kam 5 vite më ka zënë breshëri. Shteti nuk na ka përkrahur asnjëherë, as kanë ardhur t’i shohin, kot thonë jo komision, asnjë gjë, 5 vite, 18 dylym mollë” – u shpreh fermeri Ismail Rusi.

Në qarkun e Korçës janë të mbjella me mollë 3600 hektarë ndërkohë vetëm në Devoll janë afro 670 hektarë, raporton euronewsal.