Botërori 2026 mund të zhvillohet në 3 shtete

Kupa e Botës nga viti 2026 do të zgjerohet me 48 kombëtare pjesëmarrëse, megjithatë mund të ketë një tjetër risi. Ka shumë mundësi që ky gara për herë të parë në histori të zhvillohet në 3 shtete të ndryshme. SHBA, Kanadaja dhe Meksika janë gati të shprehin gatishmërinë për organizimin e kampionatit botëror.

Botërori i vitit 2026 i cili do të shtoj numrin e kombëtareve pjesëmarrëse nga 32 në 48 mund të rezervoj një tjetër risi. Kjo garë mund të zhvillohet në tre shtete të ndryshme.

Lexo po ashtu Si ka ndryshuar gjatë historisë formati i botërorit për kombëtaret?

Diçka që nëse realizohet do të ishte hera e parë në historinë e Kupës së Botës. Zgjerimi i kampionatit do të thotë edhe numër i shtuar ndeshjesh, më konkretisht nga 64 do të luhen 80 takime, por koha nuk do të ndryshoj, pra kampionati botëror do të vijoj të zhvillohet në 32 ditë, kjo sjell nevojën e më shumë stadiumeve dhe qyteteve. Për këtë arsye zhvillimi i garës në tre vende është më se i mundshëm.

SHBA janë gati të shpallin kandidaturën e tyre dhe synojnë ta shpërndajnë mbingarkesën e ndeshjeve me Kanadan dhe Meksikën.

“Një kupë Bote në SHBA-Meksikë e Canada është pa diskutim një mundësi, pasi tashmë rregullat e lejojnë diçka të tillë dhe është një shans për konfederatën e Amerikës veriore dhe qendrore”, u shpreh Victor Montagliani, president i kësaj konfederate.

Lexo po ashtu Si do të ndahen në grupe 48 kombëtaret e botërorit 2026?

Duke llogaritur shtimin e përfaqësueseve pjesëmarrëse nuk është çështja vetëm tek stadiumet, por edhe tek terrenet stërvitore, kështu që zhvillimi në shtete të ndryshme është ndoshta mundësia më e logjikshme.

Në historinë e kupës së botës një botëror është organizuar vetëm në një rast nga më shumë se një shtet, Japoni dhe Korenë e Jugut më 2002-in. Ndërsa asnjëherë ky eveniment nuk është zhvilluar në 3 vende.