Arbër Ademi: Alternativa e vetme e Maqedonisë është integrimi euro-atlantik

Zëvendëskryeministri i Qeverisë së Republikës së Maqedonisë përgjegjës për Çështje Evropiane Arbër Ademi sot kishte fjalën e tij në prezantimin e prioriteteve të presidencës së Sllovakisë me BE-në para komisionit për Çështje Evropiane, transmeton Telegrafi Maqedoni.

Gjatë fjalës së tij zëvendëskryeministri Ademi theksoi se marrja e kryesimit me BE-në nga ana e Sllovakisë ndodh në periudhën e sfidave serioze kur duhet të bëhen përpjekje të veçanta për ta kthyer besimin në projektin e përbashkët Evropian, e cila është e rëndësisë së veçantë për tërë kontinentin.

Tv21 raporton se Ademi ka potencuar se ballafaqimi me pasojat nga referendumi për daljen e Mbretërisë së Bashkuar, situatë e cila ndodh për herë të parë në historinë e Unionit si dhe me sfidat të cilat dalin nga kriza e emigrantëve do të kërkojnë angazhim dhe fokusim më të madh nga ana e institucioneve Evropiane dhe vendeve anëtare, por e gjithë kjo nuk duhet të ndikojë në procesin e zgjerimit dhe integrimit të vendeve të Ballkanit Perëndimor.

Ademi i është referuar edhe marrëdhënieve bilaterale si segment i rëndësishëm në procesin e aderimit, si dhe bashkëpunimit rajonal i cili gjithashtu është i rëndësisë së veçantë për vendet të cilat janë në procesin e aderimit duke theksuar se Republika e Maqedonisë gjithmonë ka qenë dhe do të jetë e hapur për ndërtimin dhe thellimin si të marrëdhënieve me vendet fqinje ashtu edhe me vendet e rajonit.

Në prezantimin e prioriteteve të kryesimit të Sllovakisë me BE-në Ademi edhe një herë ka potencuar konstatimin e përsëritur disa herë deri më tani se procesi i zgjerimit nuk do të përfundojë pa integrimin e vendeve të Ballkanit Perëndimor në veçanti për Maqedoninë sepse nuk ka alternativë tjetër përveç integrimit të plotë euro-atlantik./Telegrafi/