Trajneri i Real Madridit, Carlo Ancelotti ka paralajmëruar lojtarët e tij për përballjen me Chelsean në Ligën e Kampionëve para se shorti të hidhej në Nyon të Zvicrës.
Skuadra spanjolle rezervoi vendin e saj në çerekfinale të kompeticionit në fillim të kësaj jave me një fitore të përgjithshme 6-2 ndaj Liverpoolit.
Përpara ndeshjes së dytë në Madrid me The Reds, strategu italian kishte paralajmëruar skuadrën e tij se mund të ndodhte një përmbysje si ajo e Bluve.
“Ne kemi pasur përvojën e vitit të kaluar kundër Chelseat”, kishte thënë Ancelotti para ndeshjes së dytë kundër Liverpoolit. “Kemi pasur tri gola epërsi, prandaj jemi dhe kemi qenë favorit, por fakti tjetër është që duhet të luajmë edhe 90 minuta”.
“Për ta bërë këtë, duhet të luajmë me të njëjtin qëndrim si në ndeshjen e parë. Ne kemi avantazhin, por nuk mund të mendojmë të menaxhojmë lojën dhe rezultatin që patëm, duhet të luajmë 90 minuta në krye”, kishte vazhduar italiani.
Ancelotti me siguri do të shpresojë të shmangë një panik të ngjashëm këtë herë me skuadrën e tij që do të luajë me Chelsean në Ligën e Kampionëve për sezonin e tretë radhazi. Londinezët vulosën vendin e tyre në çerekfinale pasi bënë një rikthim në ndeshjen e dytë kundër gjigantëve gjermanë Borussia Dortmundit.
Andaj, ish-trajneri i skuadrës londineze e di se çfarë i pret ata dhe ndeshja e parë luhet në Santiago Bernabeu, aty ku duhet të përfundojnë punën, pasi në Stamford Bridge do të jetë më e vështirë për ta. /Telegrafi/