Qyteti Sigiriya, i vendosur në zemër të Sri-Lankës, është një nga vendet arkeologjike më mbresëlënëse të këtij vendi aziatik
Ky qytet i lashtë, emri i të cilit do të thotë "shkëmb i vogël", dëshmon për shkallën e lartë të aftësive inxhinierike dhe vizionit artistik të njerëzve të shekullit të pestë.
Kombinimi i tij unik i konturave natyrore, arkitekturës luksoze dhe sistemeve hidroteknike e bën atë një temë të pashtershme për kërkim dhe admirim midis shkencëtarëve bashkëkohorë.
Koha shëron të gjitha plagët, thotë një fjalë e urtë popullore. Por koha çon edhe në harresën e disa gjërave, duke përfshirë qytetet dikur të mëdha dhe të fuqishme, është gjithashtu një përfundim që mund të nxirret. Kjo histori flet për një qytet të tillë, transmeton Telegrafi.
Qyteti i humbur në Sri-Lankë
Në zemër të Sri-Lankës shtrihet qyteti i Sigiriyas, siç sugjeron edhe emri i tij (i përkthyer si 'shkëmb i vogël'), i ndërtuar mbi Shkëmbin e Luanit me lartësi 180 metra, 360 metra mbi nivelin e detit. Për shkak të planifikimit të sofistikuar urban, qyteti është një objekt admirimi për shkencëtarët e sotëm.
Ishte qendra politike e Sri-Lankës për një shekull e gjysmë, dhe sot rrënojat e ruajtura në mënyrë të përsosur janë një destinacion popullor turistik.
Një pallat në qiell
U ndërtua në shekullin e 5-të gjatë sundimit të mbretit Kasyapa si një fortesë që përmbante një pallat mbretëror, kopshte ujore, kopshte botanike dhe një tempull budist. Se si saktësisht u ndërtua një strukturë e tillë në majë të një shkëmbi në një kohë pa teknologji mbetet një mister, por legjendat lokale thonë se u ndërtua nga perënditë si një pallat në qiell.
Më vonë, vendi u banua nga priftërinj budistë derisa edhe ata u larguan, dhe qyteti mbeti i harruar në histori midis viteve 1155 dhe 1831 dhe pësoi fatin e gëlltitjes nga xhungla.
U rizbulua nga eksploruesit evropianë në fillim të shekullit të 19-të. Historianët dhe arkeologët punuan pa u lodhur për ta ruajtur vendin sa më mirë të ishte e mundur. Në vitin 1982, ai u përfshi në Listën e Trashëgimisë Botërore të UNESCO-s, ndërsa në vitin 2009 u hap Muzeu Sigiriya, i cili përfshin tri dekada kërkimesh arkeologjike.
Qyteti ndodhet tre orë larg kryeqytetit të Sri Lankës, Kolombos dhe është i hapur për turistët çdo ditë. Pasi ngjiten 1,250 shkallë që përfundojnë në një kalim midis putrave të luanit prej guri, vizitorët mund të kalojnë orë të tëra duke eksploruar këtë monument fantastik të arkitekturës dhe ndërtimit të një qytetërimi të lashtë.
/Telegrafi/