Arsenali zyrtarizon transferimin e Ezri Konsas nga Aston Villa

Arsenali ka zyrtarizuar transferimin e Ezri Konsas nga Aston Villa, duke përforcuar mbrojtjen përpara sezonit të ri.

Sipas burimeve të ESPN, klubet kanë arritur marrëveshje për një shumë rreth 59 milionë euro, ndërsa në marrëveshje janë përfshirë edhe bonuse me vlerë deri në 5 milionë euro. Aston Villa kishte refuzuar më herët një ofertë prej rreth 35 milionë eurosh për mbrojtësin anglez.

Konsa mbërrin në Londrën e Veriut për t’i dhënë më shumë alternativa trajnerit Mikel Arteta, teksa Arsenali synon të mbrojë titullin e Premierligës dhe të shkojë një hap më tej në Ligën e Kampionëve, pasi sezonin e kaluar u mposht nga Paris Saint-Germain në finale.

Megjithatë, mbrojtësi nuk do të jetë i gatshëm për ndeshjen hapëse të Ligës Premier ndaj Coventryt të premten. Debutimi i tij mund të vijë pikërisht kundër ish-klubit të tij, Aston Villas, të hënën e ardhshme.

“Është një moment krenarie për mua dhe familjen time të luaj për një nga ekipet më të mira në botë”, deklaroi Konsa për mediat e klubit.

28-vjeçari është i aftë të luajë si qendërmbrojtës dhe mbrojtës i djathtë, duke i ofruar Artetës një alternativë të rëndësishme në prapavijë. Arsenali ka probleme me dëmtimet, pasi Ëilliam Saliba dhe Jurriën Timber pritet të mungojnë në fillim të sezonit.

Konsa ishte gjithashtu pjesë e rëndësishme e Anglisë në Kupën e Botës, ku kombëtarja e drejtuar nga Thomas Tuchel arriti deri në gjysmëfinale dhe përfundoi në vendin e tretë.

Për Aston Villan, largimi i Konsas është një tjetër goditje e rëndësishme. Klubi ka humbur më herët edhe Morgan Rogers, i cili u transferua te Chelsea, dhe Youri Tielemans, që iu bashkua Manchester Unitedit./Telegrafi/