Afërdita Paqarada shndërron Aeroportin në ‘pasarelë mode’ (Video)

Aeroporti Ndërkombëtar i Prishtinës “Adem Jashari” në mbrëmjen e së hënës do të shndërrohet në një vend arti. Për herë të parë, pista e aeroportit Zona E 65 do të shërbejë për një sfilatë mode me një prezencë aerodinamike, njofton emisioni Express i KTV-së. Një fluturim përrallor me “Aphrodite” do të zgjasë 45 minuta.

Dizajnerja Afërdita Paqarada tashmë është në përgatitjet e fundit për shfaqjen e koleksionit më të ri që është i pesti me radhë dhe quhet “Arba”.

Ideja e saj që kjo pistë të shndërrohet në pasarelë mode, për shumëkënd ishte e pazakontë. Ky aktivitet pasqyron një nga aktivitetet e radhës të organizuara nga Paqarada në të mirë të komunitetit.

Koleksioni “Arba” është koleksion që targeton femrën profesioniste e të angazhuar dhe që në dinamiken e jetës shpreh elegancën e vet. Inspirimin për këtë koleksion, dizajnerja e ka gjetur te vajza e saj, Arba.

Imazh i fotosesionit të koleksionit “Arba” është aktorja Ema Uka, prezenca e së cilës, sipas Paqaradës, i ka dhënë një mbështetje të madhe kauzës.

Koleksioni “Arba” i cili përmban gjithsej 40 fustane, do të jetë më inovativ dhe meqë inspirimi vjen nga punimet e vajzës së Afërditës, koleksioni do të jetë shumëngjyrësh.