8,825 raste aktive dhe 40,987 të shëruar nga coronavirusi

Instituti Kombëtar i Shëndetit Publik bën të ditur se numri total i rasteve pozitive është 51.144 raste nga 182.329 persona të dyshimtë në virusin SARS-CoV-2 dhe 1.332 raste të vdekjes.

IKSHPK njofton se gjatë 24 orëve të fundit, janë shëruar 564 pacientë derisa numri i përgjithshëm i të shëruarve deri më sot është gjithsej 40.987 raste, kurse numri i rasteve aktive është 8.825.

Ndryshe, Instituti për dy ditë radhazi ka bërë testimin e qytetarëve në sheshin “Zahir Pajaziti” në Prishtinë.

Edhe kryetari i Prishtinës, Shpend Ahmeti një ditë më parë ka dhënë detaje rreth efikasitetit të testit antigjen të shpejtë Covid-19.

Përmes një statusi në Facebook ka thënë se rreth 140 teste në ditë po bëhen me udhëzim nga mjeku.

Sipas tij, mesatarja nga 130-140 teste është 35-40 pozitive.

“Sot e provova vetë testin antigjen të shpejtë Covid që Komuna ka filluar para dhjetë ditëve. Rezultat pas 20 minutave me saktësi të lartë dhe i lehtë për tu administruar. Rreth 140 teste në ditë po bëhen me udhëzim nga mjeku. Mesatarja nga 130-140 teste është 35-40 pozitive.

Po ashtu tashmë Komuna e Prishtinës si duket e vetmja në Kosovë tashmë ofron testin D-Dimer falas për ta lehtësuar koston për qytetarët. Edhe pak! Tuneli ka fund”, ka shkruar Ahmeti. /Telegrafi/