Kandidatët e Partisë Socialiste të Shqipërisë kanë dalë fitues në 5 nga 6 bashki që u organizuan zgjedhjet e pjesshme lokale të mbajtura më 6 mars, ndërkohë koalicioni “Shtëpia e Lirisë” ka shpallur fitoren në Shkodër.
Sipas të dhënave paraprake ta Komisionit Zgjedhor të Zgjedhjeve, së fundmi PS ka fituar edhe Bashkinë e Durrësit, një nga bashkitë më të mëdha në vend.
Kandidatja e PS-së, Emiriana Sako ka arritur të sigurojë 39,157 vota në Durrës ose 58% të votave, e ndjekur nga Ardian Muka i “Shtëpisë së Lirisë” me 20,831 vota. I treti në listë renditet Luan Hoti i Partisë Demokratike me 7,937 vota.
Më herët, kandidatët e PS-së fituan me radhë në Vorë, Rrogozhinë, Lushnjë dhe Dibër.
Ndërkohë vazhdon numërimi në Shkodër, ku garën deri tani po e fiton kandidati i koalicionit ‘Shtëpia e Lirisë’, Bardh Spahia.
Ndërkohë që procesi i numërimit në Shkodër është drejt fundit dhe Bardh Spahia kryeson me mbi 43% të votave, ka reaguar edhe Komisioni i Rithemelimit të Partisë Demokratike, pjese e koalicionit ‘Shtëpia e Lirisë’.
Në një deklaratë të shpërndarë në media, Komisioni i Rithemelimit falënderon të gjithë demokratët dhe anëtarët e koalicionit “Shtëpia e Lirisë”, për mbështetjen e tyre në zgjedhjet e 6 Marsit, ndërsa shprehet se u përballën jo vetëm “me regjimin” e Kryeministrit Edi Rama por edhe me PD-në të cilën e quan fasadë dhe shtojcë të Ramës.
Ish-kryeministri Sali Berisha ka shprehur falënderimin e tij për votuesit përmes rrjeteve sociale. /Telegrafi/
