Rektori i UP-së, Qerim Qerimi, e ka nderuar me mirënjohje Joachim Rücker, përfaqësuesin Special të Sekretarit të Përgjithshëm të Kombeve të Bashkuara për Kosovën në periudhën 2006-2008.
Në fjalimin e tij, rektori Qerimi e përshëndeti Rücker për kontributin e tij të ndërthurur në ndërtimin e strukturave institucionale dhe për promovimin e demokracisë në Kosovë, në kohën e para, gjatë dhe pas pavarësisë së saj.
Ai u shpreh se Rücker e pa Kosovën jo vetëm si një vend me sfida, por edhe me potencial dhe vullnet për të përparuar.
Sipas njoftimit të Universitetit të Prishtinës, Rücker shprehu falënderimin e tij për rektorin për këtë vlerësim të veçantë.
Joachim Rücker, gjatë vizitës në Universitetin e Prishtinës, ligjëroi për rolin e misionit të OKB-së në prag të pavarësisë së Kosovës, para studentëve të Departamentit të Historisë.
Rücker u shqua në mënyrë të veçantë për menaxhimin e situatës dhe për kontributin në rrugën drejt pavarësisë së plotë të Kosovës.
Ai ndihmoi në krijimin e një atmosfere të përshtatshme për dialog dhe zhvillimin e marrëdhënieve ndërkombëtare të Kosovës./Telegrafi/
