Truku i Elizabeth Taylor-it që u bë trend vetëm gjysmë shekulli më vonë
Dekada përpara se kjo teknikë e kujdesit për fytyrën të bëhej e njohur, fituesja e famshme e Çmimit Oskar e përdori atë në mënyrën e saj për ta mbajtur lëkurën të hidratuar, të shëndetshme dhe rinore.
Bukurinë e rrallë dhe të pabesueshme Elizabeth Taylor e shoqëroi me dashurinë e saj të madhe për grimin dhe kozmetikën, ndaj aktorja legjendare, përveçse ishte më e bukura e kohës së saj, ishte edhe një nga femrat më të kuruara në Hollywood.
E famshmja Liz kujdesej tërësisht për lëkurën dhe flokët e saj, mendonte për çdo detaj, kishte një rutinë komplekse dhe dihet pak se ajo përdori një piling të pazakontë të cilit i detyrohej dukja e saj rinore dhe fytyra krejtësisht të lëmuar, transmeton Telegrafi.
Siç shkruante dikur Vogue, Elizabeth Taylor e rrojti fytyrën për të hequr qelizat e vdekura të lëkurës dhe për të krijuar një “kanavacë” krejtësisht të pastër për grim.
Sot, kjo teknikë njihet si dermaplaning dhe përfshin pastrimin e thellë të lëkurës, falë të cilit lëkura e fytyrës “merr frymë” më lehtë, shfaqet më e pushuar, e hidratuar dhe e freskët.
Çfarë është dermaplaning dhe si kryhet?
Ndërsa në të kaluarën damat si Elizabeth Taylor dhe Marilyn Monroe përdornin brisqe të zakonshme, sot ekzistojnë bisturi të specializuara për këtë, falë të cilëve mund të hiqni edhe qimet më të buta dhe më të holla. Dermaplaning në fakt funksionon si peeling, dhe ky trajtim është dëshmuar të jetë shumë i dobishëm.
Siç shpjegojnë ekspertët, falë dermaplaning-ut, i cili zakonisht kryhet një herë në muaj, lëkura thith më mirë produktet e kujdesit, dhe grimi ngjitet më mirë në lëkurë dhe fytyra duket më e freskët.
Para së gjithash, ky trajtim ka për qëllim pastrimin e lëkurës së yndyrshme që është e prirur ndaj akneve dhe pikave të zeza, por mund të përshtatet edhe me lëkurën normale.
Megjithatë, kini parasysh se duhet të keni kujdes me dermaplaning – nëse nuk bëhet me mjeshtëri, mund të shkaktojë inflamacion dhe skuqje të lëkurës. /Telegrafi/