Fernando Santos, përzgjedhësi i Portugalisë, sot gjatë ditës publikoi listën prej 26 lojtarëve që do ta marrin pjesën në Katar 2022.
Ai ka lënë jashtë emra të tillë si Gonçalo Guedes dhe Renato Sanches, që në të shkuarën ftoheshin rregullisht.
“Kemi vëzhguar dhe analizuar gjithçka në këto muaj. Thirrjet janë bazuar në atë që kemi parë, nuk ka asgjë të re. Ne duam që të kemi lojtarët më të mirë si në sulm, ashtu edhe në mbrojtje”.
“Mund të kishim bërë edhe zgjedhje të tjera. Deri në fund kishte dyshime, sepse disa lojtarë janë të ngjashëm sa u përket statistikave. Ne do të marrim të gjithë përgjegjësinë për zgjedhjet e bëra”.
“Nuk duhet të fokusohemi në çështje individuale, në përjashtime individuale. Duhet të mendojmë se çfarë është më e mira për ekipin”, ka thënë ai fillimisht.
Ai tha se do të mundohen ta fitojnë Kupën e Botës, ndërsa Francën e sheh si favorite. Më fund u ndal edhe te Cristiano Ronaldo.
“Mendoj se mund të synojmë trofeun, kjo skuadër mund ta bëjë këtë. Favorite është Franca, pasi ka fituar Botërorin e fundit”.
“Ne do të përpiqemi të kuptojmë se cilat janë kushtet më të mira për marrë më të mirën nga individë të veçantë, përfshirë Cristianon”, ka thënë ai. /Telegrafi/