Rrugët e Kosovës vazhdojnë të jenë vrastare për pjesëmarrësit në komunikacion. Sipas Policisë për 11 muaj në Kosovë, 96 persona kanë vdekur në aksidente të ndryshme komunikacioni.
Krahasuar me vitin 2022, shifrat janë pothuajse të njëjta. Pra në periudhën e njëjtë të vitit të kaluar ishin shënuar 98 viktima.
Në statistikat e policisë, dërguar Telegrafit, shihet se këtë vit ka rritje të aksidenteve me persona të lënduar.
Gjatë këtij viti 15459 persona u lënduan në aksidente komunikacioni, ndërsa vittin 2022 kishte 13369 persona me lëndime trupore.
Sivjet kishte 21370 aksidente, ndërsa vitin e kaluar 18886, që i bie një rritje e dukshme e aksidenteve krahasuar me 2022.
Policia e Kosovës në kuadër të planifikimeve strategjike, thotë se ka paraparë edhe sigurinë në trafik, kur përveç kësaj ka hartuar edhe urdhra operativ dhe veprime policore në nevel qendror dhe atë lokal/rajonal.
Po ashtu Divizioni i Komunikacionit rrugor, gjegjësisht Njësia për Kontroll të Autostradave, në kuadër të aktiviteteve të veta në vazhdimësi përpilon Plane Operative me qëllim të rritjes së sigurisë në trafikun rrugor.
Gjatë vitit 2023, NjKA ka realizuar 13 Plane Operative (PO) të ndryshme, si:
PO- Kontrolli i mjeteve të transportit të mallrave dhe udhëtareve;
PO- Kontrolli i Shpejtësisë së lëvizjes së mjeteve;
PO- Kontrolli i Alkoolit etj. Ndërsa sa i përket ‘garave me automjete’, NjKA- në muajin prill 2023 ka përpiluar;
PO- Parandalimi i garave të shpejtësisë, i cili edhe tani është duke u zbatuar në bashkëpunim me Drejtorit Rajonale: Prishtinë, Ferizaj dhe Prizren;
Ky Plan Operativ është zbatuar për 4 muaj rresht dhe është ri-aktivizuar në muajin nëntor dhe vazhdon edhe në muajin dhjetor.
Po ashtu, Njësia për Kontroll të Autostradave, në bashkëpunim edhe me drejtoritë tjera rajonale të PK-së, në disa raste kanë intervenuar dhe kanë parandaluar gara të tilla ilegale duke shqiptuar gjoba të trafikut.
Rastet e fundit sipas PK-së kanë qenë me datë 05.12.2023 në hyrje -dalje të Autostradës “Ibrahim Rugova,, (Prizren- Jug) ku janë shqiptuar pesë tiketa ndërsa me datën 07.12.2023 në dy lokacione të ndryshme, Trudë dhe Mazgit- Hyrje dalje të Autostradës, NJKA së bashku me NJRSH- Prishtinë, ka parandaluar gara të tilla dhe ka shqiptuar katërmbëdhjetë (14 ) tiketa për kundërvajtje – pjesëmarrja në gara të shpejtësisë.
Gjatë vitit 2023 NJKA, përveç kundërvajtjeve tjera, vetëm për pjesëmarrje në gara shpejtësie ka shqiptuar shtatëdhjetë e tetë (78) tiketa trafiku nga nenin 54 paragrafi 3, gjithashtu një numër i konsiderueshëm i qytetarëve apo vozitësve që janë hasur të ndaluar në hapësirat e autostradës janë gjobitur për ndalim të parregullt.
“Përveç realizimit të planeve operacionale, prezencës së shtuar policore në terren, angazhimit të njësiteve policore me veturat inteligjente në patrullime dhe pika kontrolli, ligjërimeve në shkolla, fushatave të ndryshme sensibilizuese me media, bashkëpunimi dhe koordinimi i aktiviteteve me institucionet relevante në një formë apo tjetër”, thotë Policia.
Policia e Kosovës, thekson po ashtu se përmes Divizionit të Trafikut, në vazhdimësi bën edhe rekomandime për institucionet qendrore dhe ato lokale mbi të gjeturat dhe nevojat e paraqitura në rrugët nacionale, rajonale dhe ato lokale, me qëllim të rritjes së mëtejme të sigurisë rrugore, e që ndikon drejtpërsëdrejti në parandalim të aksidenteve fatale dhe në shpëtim të jetës së qytetarëve.
Forma tabelare me numrin e aksidenteve për periudhën kohore janar- nëntor 2022 dhe 2023./Telegrafi/
