Site icon Telegrafi

Mësohen dy blerjet e para të Amorim te United, të dy janë pjesë e Bayern Munichut

Manchester United është bërë me trajner të ri dhe në afatin kalimtar të janarit synon të përforcohet.

Djajtë e Kuq ishin aktiv gjatë verës duke shpenzuar mbi 200 milionë euro për nënshkrimin e emrave si Joshua Zirkzee, Leny Yoro, Matthijs de Ligt, Noussair Mazraoui dhe Manuel Ugarte.

Pavarësisht nënshkrimeve të mëdha, Djajtë e Kuq nuk kanë pasur një start të mirë të sezonit duke zënë aktualisht vendin e 13-të në Ligën Premier gjë që bëri të shkarkohet Erik Ten Hag.

Ruben Amorim është emëruar si zëvendësues i tij dhe zyrtarisht do të marrë drejtimin e Old Trafford javën e ardhshme.

Amorim dhe bordi i United duan përforcime në janar dhe raportohet se dy yjet e Bayernit, Leroy Sane dhe Leon Goretzka janë objektivat kryesorë të Djajve të Kuq.

“Manchester United është i interesuar për Leroy Sane dhe tanimë ka pyetur për të, ai është i lirë në verë, por United duan transferimin në janar”, ka shkruar gazetari gjerman Christian Falk.

Ndërkohë Florian Plettenberg ka raportuar se ylli tjetër i Bayernit, Leon Goretzka gjithashtu është një nga objektivat e United për tu transferuar në janar. /Telegrafi/

Exit mobile version