“Ka qenë kaos”, ka thënë Raphael Poch, një zëdhënës për shërbimet kombëtare vullnetare të urgjencës mjekësore të Izraelit “United Hatzalah”.
Ai tha për programin Newsday të BBC-së se u zgjua herët në mëngjes të shtunën nga breshëria e raketave që ishin pjesë e sulmit të Hamasit ndaj Izraelit, i cili deri më tani ka vrarë rreth 900 njerëz, përcjell Telegrafi.
Në orët e tmerrshme që pasuan, Poch tha: “një pjesëtar i vullnetarëve tanë u plagos dhe një u vra ndërsa përpiqej të shpëtonte jetën e njerëzve të tjerë që u plagosën”.
Bëhet e ditur se rreth 1,500 vullnetarë në të gjithë Izraelin u dërguan për të ndihmuar në ofrimin e shërbimeve mjekësore për njerëzit.
Poch përshkroi se si i transportuan të plagosurit me helikopterë dhe auto-ambulanca në spitalet më të afërta.
Ndërkohë vullnetarët e rinj vazhdojnë të ndërhyjnë për të zëvendësuar ata që janë të lodhur dhe kanë nevojë për pushim, shtoi ai.
“Ne po shkojmë nga shtëpia në shtëpi në qytetet ku njerëzve u thuhet të mos largohen ose të dalin nga shtëpitë e tyre sepse është shumë e rrezikshme, duke u dërguar atyre ushqim, ujë dhe furnizime mjekësore”, citohet të ketë thënë ai.
“Ne po bëjmë gjithçka që mundemi”. /Telegrafi/