Ashtu siç pritej, Cristiano Ronaldo u shpall Lojtari më i mirë në botë nga FIFA, mirëpo në votime ka pasur disa befasi.
Më i miri është zgjedhur përmes votave të përziera të kapitenëve të kombëtareve dhe trajnerëve, tifozëve dhe gazetarëve.
Superylli i Real Madridit fitoi 43 për qind të votave, Lionel Messi ishte i dyti me 19 për qind të votave, ndërsa Neymar mori gjashtë për qind të votave në vend të tretë.
Dhe derisa shumica e votuesve i zgjodhën tre të përmendurit, disa prej tyre kanë pasur ide të tjera.
Ronaldo dhe Messi e ruajtën traditën duke mos e votuar njëri-tjetrin. Portugezi i zgjodhi tre bashkëlojtarët e tij te Reali, Luka Modric, Sergio Ramos dhe Marcelo, ndërsa të njëjtën gjë e bëri edhe argjentinasi me dy lojtarët e Barcelonës, Luis Suarez dhe Andres Iniesta, si dhe ish-bashkëlojtarin Neymar (që tash luan te Paris Saint-Germaini).
Mesfushori ofensiv i Chelseat, Eden Hazard, vendosi që t’i jepte prioritet bashkëlojtarit të tij, N’Golo Kante, duke e votuar për më të mirin në botë. Ronaldo dhe Modric ishin dy zgjedhjet tjera të tij.
Kapiteni i Belgjikës nuk ishte i vetmi që e votoi Kanten për më të mirin. Edhe kapiteni i Bahamas, Lesly St Fleur dhe kapiteni i Republikës Dominikane, Euclid Bertrand, po ashtu e zgjodhi atë.
Portieri i Tottenham Hotspur, Hugo Lloris, e pati Harry Kane në përzgjedhjen e tij, mirëpo pas Ronaldos dhe Ramosit. Për Kane si më i miri votoi gazetari i Vanuatus, Nase Raymond.
Mesfushori i Manchester Unitedit, Henrikh Mkhitaryan, zgjodhi këtë renditje: Ronaldo, Gianluigi Buffon dhe Neymar.
Sulmuesi i Unitedit, Zlatan Ibrahimovic, ishte i popullarizuar sidomos ndër kombet aziatike. Kapitenët e Taipeit Kinez dhe Nepalit ishin ndër ata që e zgjodhën pikërisht suedezin, edhe pse ai nuk ka luajtur në gjashtë muajt e fundit.
Ish-futbollisti i Fulhamit, Bryan Ruiz, bëri ndoshta zgjidhjen më të çuditshme duke e votuar si më të mirin portierin e Real Madridit, Keylor Navas.
Kapiteni i Realit, Sergio Ramos, tregoi klas duke e votuar Messin të dytin pas Ronaldos dhe para Modricit.
Kapiteni i Anglisë, Jordan Henderson, përzgjodhi Ronaldon, Messin dhe Suarezin, derisa trajneri Gareth Southgate votoi për Ronaldon, Modricin dhe Toni Kroosin.
Përzgjedhësi i Belgjikës, Roberto Martinez, e votoi Hazardin si më të mirin, para Ronaldos dhe Modricit. /Telegrafi/