Gjermania ka vendosur të forcojë masat kufizuese për personat të cilët nuk janë vaksinuar kundër COVID-19.
Sipas medieve të huaja, përcjell Telegrafi, njerëzit e pavaksinuar nuk do të jenë në gjendje të hyjnë në dyqane jo thelbësore, restorante, vende kulturore apo argëtimi, njoftoi të enjten kancelarja në largim Angela Merkel.
Masat e reja u ndërmorën pas një takimi midis Merkelit dhe kancelarit të ardhshëm Olaf Scholz dhe liderëve të 16 landeve të vendit.
Ata gjithashtu e kanë konfirmuar se një projektligj për vaksinimin e detyrueshëm, të cilin Scholz e mbështet, do t’i paraqitet parlamentit për hyrje në fuqi në muajin shkurt ose mars.
Ndryshe, Gjermania ka raportuar të enjten 73 mijë raste të reja si dhe 388 viktima.
Pak më pak se 70 për qind e popullsisë së Gjermanisë është e vaksinuar kundër coronavirusit – më pak se disa vende përfshirë Francën dhe Britaninë e Madhe.
Masat e sapo shpallura nga Gjermania janë një “akt i solidaritetit kombëtar” për të “ulur shkallën e infeksionit dhe për të hequr presionin nga sistemi ynë shëndetësor”, thotë Merkel. /Telegrafi/