Më shumë se 30 mijë tifozë të Real Madridit kanë votuar për formacionin startues që e duan për ndeshjen kundër Bayern Munichut.
Los Blancos kanë udhëtuar në Allianz Arena për takimin e parë gjysmëfinal të Ligës së Kampionëve kundër bavarezëve, ndërsa as.com ka bërë një sondazh për formacionin e preferuar të tifozëve madrilenë.
Rezultati i sondazhit ka dhënë një skuadër të ngjashme me atë të finales së Cardiffit, por në formacion mungon Karim Benzema.
Tetë lojtarë janë të padiskutueshëm kur është fjala për njëmbëdhjetëshin bazë të Realit, sipas tifozëve dhe ata kanë marrë më shumë se 94 për qind të votave për pozitën ku luajnë.
Këtu bëjnë pjesë: portieri Keylor Navas, kapiteni Sergio Ramos, mbrojtësit tjerë Dani Carvajal, Raphael Varane e Marcelo, mesfushorët Luka Modric dhe Toni Kroos, si dhe superylli Cristiano Ronaldo.
Tre të tjerët kanë marrë përqindje më të vogël të votave, por e kanë siguruar vendin në ekipin bazë, gjithmonë sipas tifozëve, janë Casemiro (85.79 %), Isco (81.82 %) dhe Marco Asensio (59.56 %).
Lucas Vazquez ishte shumë pranë (40.92 %), por ka mbetur jashtë formacionit startues.
Në bankën rezervë atij i janë bashkuar edhe Karim Benzema, Gareth Bale, Mateo Kovacic, Jesus Vallejo, Theo Hernandez e Luca Zidane – të cilët kanë marrë më pak se 20 për qind votash për pozitat e tyre.
Pritet të shihet nëse Zinedine Zidane do të ketë mendim të ngjashëm me dëshirat e tifozëve. /Telegrafi/