“Normal si çdo lojtarë tjetër edhe ëndrra imë është të luaj në Evropë”. Kështu kishte thënë për Radio Televizionin Dukagjini, para një viti, ish-futbollisti Trepçës 89, Arb Manaj. 22-vjeçari, e ka realizuar ëndrrën.
Madje, i ka dhënë ngjyrë me shkëlqimin e tij në fushë. Manaj është njeriu i momentit te skuadra e tij, Ankara Keciorengucu në Ligën e Parë të Turqisë.
Ai ka katër gola në tri ndeshjet e fundit në kampionat, duke ndikuar direkt në ngritjen e ekipit të tij, që momentalisht ndodhet në vendin e dytë në renditje.
“Në tri ndeshjet e fundit kam shënuar katër gola dhe ky fakt më gëzon shumë. Po kalojë nja fazë mjaft të mirë personale dhe ekipore pasi jemi në vendin e dytë dhe kemi gjasa të mirë që të ngjitemi në Supërligë”, deklaroi për RTV Dukagjinin, Arb Manaj.
Një sulmues i rrezikshëm si Manaj, është ambientuar shumë shpejt në Ligën e Parë turke, ndonëse nuk e kreu fazën përgatitore në Turqi.
“Normalisht se ambientimi ka qenë mjaft i vështirë pasi që nuk kam qenë pjesë e fazës përgatitore, por tani jam ambientuar dhe shpresojë të vazhdojë kështu”, deklaroi Arb Manaj, përcjell Telegrafi.
Niveli i Ligës atje, nuk po e pengon Manajn të shënoi vazhdimisht dhe të jetë rreziku kryesor për mbrojtjen kundërshtare.
“Niveli i ligës është mjaft i mirë. Ka dallim me Superligën e Kosovës pasi këtu futbolli është shumë më fizik dhe ritmi është shumë i lartë”, tregon Manaj.
Në xhiron e fundit, skuadra e tij Ankara Keciorenguxhu, pati punë shumë të vështirë ndaj një prej pretendentëve për t’u ngjitur në elitë, Adana Demirsporit. Manaj ishte hero i skuadrës duke shënuar golin e vetëm për tri pikë të arta të kryeqytetasve.
Sulmuesi nga Klina, vese është në objektivat personale, teksa përmend edhe synimet e skuadrës.
“Primare për mua ka qenë që të jem në formacionin bazë të ekipës, e që kam arritur, ndërsa qëllimi i skuadrës është që të ngjitemi në Superligë”, deklaroi Arb Manaj për RTV Dukagjinin.
Forma e lartë e 22-vjecarit, ka bërë që shumë skuadra ta monitorojnë nga afër, por ai nuk preferoi të flas për këtë duke thënë se është plotësisht i fokusuar te ekipi aktual. Arb Manaj ka 4 gola e 2 asistime në 11 ndeshje kampionat në Ligën e Parë të Turqisë, kurse ka shënuar edhe 2 gola të tjerë në ndeshjen e Kupës./RTV Dukagjini/Telegrafi/