Ekspertiza e leximit të buzëve zbulon fjalët ofenduese dhe raciste të Neymar ndaj Hiroki Sakai

Radioja spanjolle, Cadena SER, i ka publikuar pamjet dhe dyshimet për abuzim racor të Neymarit kundrejt Hiroki Sakai, në ndeshjen ndërmjet Paris Saint-Germainit dhe Olympique Marseille.

Derbi klasik francez u shoqërua me kundërthënie të shumta, ofendime dhe përleshje fizike.

Sfida përfundoi me pesë kartonë të kuq, ndërsa takimin e fitoi skuadra e Marseille me një gol të shënuar nga Florian Thauvin.

Neymar që e goditi në kokë Alvaro Gonzalezin e ka akuzuar spanjollin për abuzim racor, ndërsa tash kur pritet të vijë vendimi nga Komiteti Disiplinor, është bërë e ditur se qasje abuzive ndaj lojtarëve kundërshtarë ka pasur vet braziliani.

Lexo po ashtu Neymar shfrytëzoi tollovinë për t’iu hakmarrë Gonzalezit, por kjo nuk i iku VAR-it

Xhirimi – në të cilin shihet sulmuesi duke iu drejtuar futbollistit japonez, Hiroki Sakai – aludon se ai e ka ofenduar lojtarin kundërshtar në baza racore.

Cadena SER raporton se, sipas një transkriptimi të bazuar në ekspertizën e leximit të buzëve, Neymar i referohet futbollistit japonez si kinez dhe e quan “jashtëqitje kineze”, ndërsa më pas shihet duke iu referuar ligës franceze me fjalë ofenduese.

Në bazë të njoftimit të RMC Sport, Marseille do ta shfrytëzojë këtë video për t’u mbrojtur në rastin e Alvaro Gonzalez. /Telegrafi/