Sekretari amerikan i Shtetit, Antony Blinken njoftoi një ndihmë shtesë prej 1.85 miliard dollarësh për sigurinë e Ukrainës, duke përfshirë transferimin e parë të sistemit të mbrojtjes raketore Patriot.
Para arritjes së Volodymyr Zelenskyt në Uashington – vizita e parë e presidentit ukrainas që prej pushtimit rus në Shtëpinë e Bardhë – Blinken ka lëshuar një deklaratë për mediat rreth ndihmës më të re për Ukrainën.
“Në bazë të delegimit të një të drejte të Presidentit, sot po autorizoj ndihmën e njëzet e tetë të armëve dhe pajisjeve të SHBA-së për Ukrainën që nga gushti i vitit 2021. Kjo ndihmë prej 1 miliard dollarësh do t’i sigurojë Ukrainës një mbrojtje të zgjeruar ajrore dhe aftësi për goditje precize, si municione shtesë dhe pajisje kritike që Ukraina po i përdor në mënyrë kaq efektive në fushën e betejës”, tha Blinken.
Blinken shtoi se Pentagoni do të njoftojë gjithashtu 850 milionë dollarë ndihmë të re të sigurisë për Ukrainën, raporton cnn.
Diplomati më i lartë amerikan tha se kjo ndihmë e re vjen pasi Kremlini “ka provuar dhe ka dështuar ta fshijë Ukrainën nga harta” dhe tani po kërkon të “armatoset gjatë dimrit” për të goditur infrastrukturën.
Patriot është një sistem i avancuar i mbrojtjes ajrore me rreze të gjatë që është shumë efektive në kapjen e raketave balistike dhe të lundrimit.
“Asistenca e sotme përfshin për herë të parë Sistemin e Mbrojtjes Ajrore Patriot, i aftë për të rrëzuar raketat e lundrimit, raketat balistike me rreze të shkurtër dhe aeroplanët në një tavan dukshëm më të lartë se sistemet e mbrojtjes ajrore të ofruara më parë”, tha Blinken.
Blinken përsëriti se SHBA do të vazhdojë “të mbështesë Ukrainën për aq kohë sa të duhet, në mënyrë që Kievi të vazhdojë të mbrohet dhe të jetë në pozicionin më të fortë të mundshëm në tryezën e negociatave kur të vijë koha”. /Telegrafi/