Sot më datë 10 korrik 2024, Drejtoria për Mbrojtjen e Mjedisit (DMM) ka pranuar një ankesë nga banorët që jetojnë në afërsi të termocentralit Kosova B.
Në ankesën e banorëve thuhet se nga orët e hershme të ditës së sotme ka ndotje nga TC B-ja, transmeton Telegrafi.
Në një komunikatë Komuna e Obiliqit, njofton se DMM-ja ka inspektuar gjendjen nga afër dhe ka vërejtur se nga oxhaku i TC B po shkarkohet tym i zi vazhdueshëm dhe i pandërprerë.
“Pas marrjes së informatave (ankesave), DMM-ja ka inspektuar gjendjen nga afër dhe ka vërejtur se nga oxhaku i TC B po shkarkohet tym i zi vazhdueshëm dhe i pandërprerë. Andaj, kemi shprehur shqetësimin tonë për tymin dhe pluhurin e shkaktuar nga termocentrali”, thuhet në komunikatë.
Tutje në njoftim thuhet se DMM ka kërkuar nga KEK që ta informojë për të gjitha situatat në mënyrë të drejtpërdrejtë. Duke shtuar se nëse nuk respektohen ligjet dhe udhëzimet mbi vlerat e lejuara të shkarkimeve, do të veprohet konform ligjeve në fuqi.
“Në rastet e tilla, por edhe në përgjithësi, të njoftohet DMM-ja për problemet (vështirësitë) që ka KEK-u, duke na informuar në mënyrë të drejtpërdrejtë, në mënyrë që të ketë bashkëpunim mes DMM-së dhe KEK-ut, për të gjitha situatat aktuale dhe të përbashkëta, për të mirën tonë dhe të qytetarëve tanë, ashtu siç kemi vepruar në të kaluarën. Drejtoria e Mjedisit kërkon të respektohen ligjet dhe udhëzimet mbi vlerat e lejuara të shkarkimeve. Në të kundërtën, do të veprohet konform ligjeve në fuqi” thuhet në komunikatë. /Telegrafi/
