Nga Aleanca për Shqiptarët (ASH), kanë deklaruar se lista e publikuar nga Akademia për Gjykatës dhe Prokurorë edhe një herë dëshmon atë që vazhdimisht ata si ASH e kanë alarmuar.
Nga kjo parti thonë se janë përkushtuar për ta ndryshuar urgjentisht këtë nëpërmjet zgjidhjeve sistemore.
“Zhvillimet e fundit vetëm se konfirmojnë nevojën për realizimin e përcaktimeve tona për reforma në sistemin e gjyqësorit dhe prokurorisë, ligjin për veting, reformimin e Akademisë si imperativ, rritjen e transparencës, si dhe ndryshime të tjera që do të mbajnë politikën larg drejtësisë dhe drejtësinë do ta rikthejnë në shërbim të ligjit dhe qytetarëve”, thanë nga ASH.
Sipas tyre, periudha në vijim ky do të jetë ndër prioritetet e Aleancës për Shqiptarët, ndërsa ftojnë edhe faktorët e tjerë shoqërorë e politik që të përkushtohen seriozisht dhe me vendosmëri deri në pavarësimin e plotë të sistemit të drejtësisë në vend./Telegrafi/