Në Madrid të Spanjës është mbajtur Konventa e Mini Basketbollit, ku ka marrë pjesë edhe Drejtori Teknik në Federatën e Basketbollit të Kosovës (FBK), Arben Krasniqi.
Konventa, që është mbajtur nga 2 deri më 4 qershor, ishte pjesë përmbyllëse e trajnimit të Kursit për trajnerë të Mini Basketbollit 2022/23 të organizuar nga FIBA Europe dhe me përfundimin e suksesshëm të këtij kursi zgjidhen edhe Instruktorët Nacionalë të Mini Basketbollit nëpër Federatat përkatëse.
Në këtë Konventë ndër të tjera është diskutuar për: Metodologjia e Mësimdhënies dhe Mësimit të Trajnerëve/Efektive, Kurrikula e ecurisë së mësimdhënies, Mësimet për taktikat në grup-sulm dhe mbrojtje.
Qëllimi i këtij kursi ka qenë që trajnerët të jenë në gjendje të punojnë me fëmijët, si dhe ndarja e njohurive të fituar në këtë klinikë me trajnerët e tjerë të cilët mund të kontribuojnë për Mini Basketbollin.
Mini Basketbolli është duke shënuar rritje të jashtëzakonshme dhe FIBA Europe e ka cilësuar se Federatat kanë nevojë për më shumë trajnerë të Mini Basketbollit, të cilët janë në gjendje të ofrojnë mjedisin e nevojshëm për fëmijët, duke mësuar gjithashtu se si të luajnë lojën e basketbollit.