Andres Iniesta ka deklaruar dëshirën e tij për t’u rikthyer sërish tek Barcelona teksa mesfushori 40-vjeçari po i afrohet pensionimit.
Teksa Iniesta i është afruar perëndimit të karrierës së tij të jashtëzakonshme, 40-vjeçari ka shprehur dëshirën e përzemërt për t’u rikthyer në klubin e tij të fëmijërisë, nga i cili u largua si legjendë në vitin 2018.
Që prej atëherë ai ka luajtur në Japoni për Vissel Koben dhe verën e kaluar ai u transferua në Emiratet e Bashkuara Arabe.
Sidoqoftë, ish-fituesi i Kupës së Botës nuk e ka shijuar aventurën në Lindjen e Mesme dhe sezonin e tij të parë në Ligën e Emirateve pasi ekipi i tij ra nga liga.
Në një event të mbajtur në Madrid së fundmi, Iniesta i bëri të ditur aspiratat e tij dhe insistoi se do të donte të rikthehej tek Barcelona në ndonjë rol në të ardhmen e afërt.
“Do të doja të rikthehesha tek Barcelona, por natyrisht, nuk e di ende kur ose si, është diçka që askush nuk e di. Do të shohim se çfarë do të ndodhë”, ka thënë fillimisht Iniesta.
Iniesta gjithashtu beson se Xavit duhej t’i ipej më shumë kohë nga bordi i Barcelonës. Ish-trajneri i Barcelonës duroi një periudhë të vështirë në ‘Camp Nou’ dhe u zëvendësua nga Hansi Flick pasi dështoi ta udhëheq klubin drejt trofeve.
“Do të doja që ai të vazhdonte për atë që përfaqëson për mua. Unë shpresoj se me të (Flick), Barça do të jetë në gjendje të luftojë sërish për të gjithë titujt e mundshëm dhe të ketë stabilitet për një kohë të gjatë”, përfundoi ai.
Gjatë kohës sa ishte futbollist i Barcelonës, Iniesta fitoj disa tituj të ndryshëm, duke përfshirë nëntë tituj të La Ligës dhe katër tituj të Ligës së Kampionëve.
Ëndrra e tij për t’u rikthyer na bën të kuptojmë lidhjen shpirtërore që ka ai me klubin në të cilin bëri emër si lojtar./Telegrafi/