Kjo kompani e fshesave synon të prodhojë veturën më të shpejtë në botë

Kompania kineze Dreame Technology, e cila prodhon fshesa dhe robotë, është e vendosur jo vetëm të hyjë në tregun e veturave, por edhe të prodhojë veturën më të shpejtë në botë.

Dreame Technology, një kompani kineze e njohur për prodhimin e fshesave me korrent dhe robotëve të shpejtë elektrikë, dëshiron të "sulmojë" Bugatti Veyron legjendar.

Dreame njoftoi se deri në vitin 2027 do të prodhojë veturën më të shpejtë në botë.

Ndërsa Bugatti nuk do të heqë dorë nga motorët e saj që konsumojnë shumë karburant së shpejti, Dreame dëshiron të bëjë bujë falë një veture me një sistem fuqie tërësisht elektrik.

Nuk ka informacion se sa e fuqishme do të jetë makina e Dreame, por një gjë është e sigurt: do të ketë Inteligjencën Artificiale (IA) si shoqëruese, e cila supozohet se do të mësojë zakonet e shoferit dhe do të përshtatet me to.

Ashtu si automjetet e tjera elektrike kineze, hipervetura e ardhshme e Dreame, e cila ende nuk ka emër, do të jetë e projektuar për t'u integruar me telefonin dhe shtëpinë inteligjente të pronarit.

Kompania ka mbledhur tashmë një ekip prej gati 1,000 personash për projektin, dhe disa nga punonjësit vijnë nga industria e automobilave dhe sektori i pajisjeve inteligjente.

Nëse plani i Dreame realizohet, ai do të bëhet prodhuesi i parë në botë i fshesave që ndërton një veturë. /Telegrafi/