Fillon tallja e Bayernit në rrjetet sociale me Barcelonën: Një ëndërr e çmendur, mposhtëm 8-2 Barçën në çerekfinale të LK

Bayern Munich ka shënuar njërën nga fitoret më të thellë në kuadër të Ligës së Kampionëve.

Bavarezët i kanë shkaktuar debakël Barcelonës në çerekfinale, teksa e kanë mposhtur me rezultat të thellë 8-2.

Sikur mos të mjaftonte humbja që i shkaktuan, Bayern Munich në versionin anglisht në Twitter ka filluar talljen me katalunasit.

Llogaria e Bayernit ka postuar një foto të dy mbrojtësve, Joshua Kimmich dhe David Alaba, me austriakun që i parashtron një pyetje gjermanit.

“Çkemi Josh? Sapo kam pasur një ëndërr të çmendur: kemi mundur Barcelonën 8-2 në çerekfinale të Ligës së Kampionëve”, thuhet në përshkrimin e fotografisë nga FC Bayern Munich EN.

Ky postim i Bayernit ka marrë mijëra pëlqime dhe shpërndarje në Twitter, teksa nuk kanë munguar talljet tjera nga tifozët e Bayernit në drejtim të atyre të Barcelonës.

Një tjetër postim i Bayernit: "Ekipet që kanë shënuar tetë gola në një ndeshje eleminuese të LK-së. FC Bayern Munchen. Fundi i listës".

Thomas Muller dhe Philippe Coutinho shënuan nga dy gola, teksa Ivan Perisic, Serge Gnabry, Joshua Kimmich dhe Robert Lewandowski realizuan nga një tjetër në suksesin e madh të Bayernit.

Në gjysmëfinale të Ligës së Kampionëve, Bayern do ta pres fituesin e duelit Manchester City – Lyon që zhvillohet të shtunën mbrëma. /Telegrafi/