Juventusi ka zyrtarizuar ndërprerjen e kontratës me Arthur Melo, një lëvizje që i ka shkaktuar klubit një ndikim negativ financiar. Megjithatë, kostoja reale e këtij transferimi mund të jetë edhe më tronditëse.
Braziliani iu bashkua Juventusit në vitin 2020 nga Barcelona, në një marrëveshje që përfshinte edhe largimin e Miralem Pjanicit drejt klubit katalunas. Transferimi ishte pritur me skepticizëm që në atë kohë, ndërsa më pas doli të ishte një nga aventurat më zhgënjyese të klubit italian.
Gjatë periudhës së tij në Torino, Arthur zhvilloi vetëm 63 ndeshje zyrtare me fanellën e Juventusit, duke shënuar vetëm një gol dhe një asistim.
Duke marrë parasysh koston totale të operacionit, llogaritet se Arthur i ka kushtuar Juventusit rreth 1.48 milionë euro për çdo paraqitje me klubin.
Por shifra bëhet edhe më befasuese kur merret parasysh koha e kaluar në fushë. Duke qenë se në shumë raste e nisi ndeshjen nga banka rezervë, llogaritet se braziliani i ka kushtuar Juventusit rreth 28 mijë euro për çdo minutë të luajtur.
Arthur kaloi pjesën më të madhe të viteve të fundit duke u huazuar te klube të ndryshme, përfshirë Liverpoolin, Fiorentinën, Gironan dhe Gremion, pa arritur të bindë asnjërin prej tyre për një transferim përfundimtar.
Tashmë, pas gjashtë vitesh, Juventusi ka vendosur ta mbyllë përfundimisht kapitullin me brazilianin.
Me këto shifra, është vërtet e vështirë të gjendet një tjetër transferim në historinë e Juventusit që ka dhënë kaq pak në raport me koston./Telegrafi/