Volodymyr Zelensky ka vënë në shënjestër kryeministrin hungarez, Viktor Orbán, duke e akuzuar atë për tradhti të liderëve të tjerë evropianë pas “misionit të paqes” të Orbanit në Moskë.
Sipas mediave të huaja, përcjell Telegrafi, presidenti ukrainas e nisi samitin e Komunitetit Politik Evropian në Pallatin Blenheim të enjten me një fjalim emocionues – ku foli edhe për përpjekjet e fundit të Orbanit për t’iu afruar Moskës.
Zelensky po i drejtohej një dhome të mbushur plot me liderë evropianë dhe ministra të mbrojtjes, të cilët janë mbledhur në Oxfordshire në një moment kyç për luftën në Ukrainë.
Ai tha: “Ne kemi ruajtur unitetin në Evropë duke vepruar së bashku, që do të thotë se Putini i ka humbur objektivat e tij parësore … Ky është avantazhi ynë, por ai mbetet një avantazh vetëm për sa kohë që ne jemi të bashkuar”.
Duke iu referuar Putinit, ai tha: “Ai mund të përpiqet t’ju afrohet, ose të shkojë tek disa nga partnerët tuaj individualisht, duke u përpjekur t’ju tundojë ose t’ju bëjë presion për t’ju shantazhuar në mënyrë që njëri prej jush të tradhtojë të tjerët. Ne ruajmë unitetin tonë”.
Ndërsa në një referencë të dukshme për vizitën e fundit të Orbanit për të takuar Putinin në Moskë, ai shtoi: “Nëse dikush në Evropë përpiqet të zgjidhë çështjet pas shpinës sonë, apo edhe në kurriz të dikujt tjetër, nëse dikush dëshiron të bëjë disa udhëtime në kryeqytetin e luftë për të folur – dhe ndoshta për të premtuar diçka kundër interesave tona të përbashkëta ose në kurriz të Ukrainës ose vendeve të tjera – atëherë pse duhet ta konsiderojmë një person të tillë?”.
“BE-ja gjithashtu mund të trajtojë të gjitha çështjet e tyre pa këtë individ të vetëm”.
Orbán ka qenë rregullisht një “halë në sytë e liderëve evropianë” që përpiqen të ruajnë unitetin në mbështetjen e tyre për Ukrainën.
Në fillim të këtij viti ai bllokoi një paketë mbështetjeje prej 50 miliardë eurosh për Kievin për më shumë se një muaj, ndërkohë që ai negocioi kushte shtesë.
Këtë muaj, udhëheqësi hungarez udhëtoi në Moskë për atë që ai e quajti “mision paqeje”, duke mbajtur një konferencë të përbashkët shtypi me Putinin, në të cilën lideri rus i tha Kievit të hiqte dorë nga më shumë tokë, të tërhiqte trupat e tij dhe të hiqte përpjekjet për t’u bashkuar me NATO-n.
Orbán më pas zhvilloi bisedime me ish-presidentin amerikan Donald Trump, pas së cilës ai u shkroi liderëve evropianë duke u thënë atyre se Trump kishte “plane të bazuara mirë” për paqen nëse ai do të kthehej në Shtëpinë e Bardhë pas zgjedhjeve presidenciale të nëntorit.
Veprimet e Orbanit në skenën botërore kanë shkaktuar alarm në kryeqytetet evropiane, me ftesën e Zelensky në Pallatin Blenheim të projektuar pjesërisht si një shfaqje e mbështetjes së unifikuar për Ukrainën. /Telegrafi/