Një yll i Liverpoolit thuhet i ka thënë klubit se dëshiron të largohet këtë afat kalimtar të verës dhe të kalojë te një rival nga Liga Premier.
Slot është duke u përgatitur për para-sezonin e tij të parë si trajner i Liverpoolit, pasi e ka trashëguar rolin nga Jurgen Klopp, i cili shërbeu për një kohë të gjatë.
Në të vërtetë, holandezi ka ‘këpucë të mëdha’ për të mbushur, me Klopp që ka fituar pothuajse çdo trofe në periudhën e tij nëntëvjeçare në Anfield, duke përfshirë Ligën e Kampionëve më 2019 dhe Ligën Premier pas 30 vitesh pritje.
Dhe ndër punët e para të Slot do të jetë të qetësojë dëshirat e portierit të Reds, Caoimhin Kelleher, i cili thuhet se dëshiron t’i bashkohet një klubi të Ligës Premier këtë verë.
Sipas Football Insider, Kelleher po planifikon të shtyjë për një largim nga Anfield, me 25-vjeçarin që dëshiron të bëhet portieri numër 1 diku tjetër.
Celtic thuhet se është i interesuar për irlandezin pas tërheqjes së Joe Hart, megjithatë, mediumi anglez ka pohuar se klubi i Parkhead do ta ketë të vështirë të përmbushë vlerësimin e Kelleher nga Liverpool.
Football Insider shton se Kelleher është duke i dhënë përparësi një lëvizjeje brenda Ligës Premier pasi ka bërë përshtypje gjatë mundësive të tij në Liverpool.
Portieri bëri 26 paraqitje në të gjitha garat për Liverpoolin në sezonin 2023/24, duke përfshirë dhjetë ndeshje në Ligën Premier pas lëndimit të Allison Becker.
Kelleher mbajti pesë herë portën e paprekur dhe pësoi 32 gola në ato ndeshje.
Ylli i lindur në Cork iu bashkua Liverpoolit nga Ringmahon në vitin 2015 dhe është ngritur në radhët e të rinjve për të qenë rezervë e Alisson. Ai ka kontratë në Anfield deri në qershor të vitit 2026. /Telegrafi/